Президент Шавкат Мирзиёев раислигида саноат кооперациясини ривожлантириш ва ишлаб чиқаришни маҳаллийлаштириш чора-тадбирлари юзасидан видеоселектор йиғилиши бўлиб ўтмоқда. Бу ҳақда давлат раҳбарининг матбуот котиби Шерзод Асадов маълум қилди.
Маълум қилинишича, йиғилишда 2022—2023 йиллар учун 2,5 мингта лойиҳани ишга тушириш бўйича қабул қилинган дастурнинг аниқ ижросини сўраш вақти келгани қайд этилган. Президент кўп тармоқ ва ҳудуд раҳбарлари бу масалада ҳали дунёқарашини ўзгартирмагани, ҳозирги вазиятдан хулоса чиқармаётганини танқид қилган.
Ушбу дастур ижроси бўйича Фармацевтика агентлиги режани 51 фоизга, «Ўзбекистон темир йўллари» эса 10 фоизга бажармагани, ушбу икки тизимда саноат кооперацияси бўйича ишлар умуман бошланмагани, «Иссиқлик электр станциялари» эса режани атиги 26 фоизга бажаргани кўрсатиб ўтилган.
Шунинг учун Фармацевтика тармоғини ривожлантириш агентлиги директори Сардор Кариевга ҳайфсан эълон қилинган. Унинг иккала ўринбосарини ишдан олишга кўрсатма берилган. Шунингдек, бош вазирга мазкур агентлик фаолиятини тубдан ўзгартириш бўйича аниқ чоралар кўриш топширилган.
Бундан ташқари, «Ўзбекистон темир йўллари» раиси вазифасини бажарувчи Хуснутдин Хасиловга ҳайфсан, «Иссиқлик электр станциялари» раиси Фарҳод Абдураҳмонов, «Ўзметкомбинат» директори Рашид Пирматов, «Ўзбекнефтгаз» раисининг биринчи ўринбосари Шаҳзод Алиризаевга қатъий огоҳлантириш берилган.
Январь–февраль ойларида «Электрон кооперация» портали орқали 860 миллиард сўмлик 5 мингта шартнома тузилган бўлса-да, уларнинг ижроси айрим ҳудудларда бажарилмагани, электрон савдоларда Қорақалпоғистон, Наманган, Сурхондарё ва Хоразмдаги корхоналар улуши 1 фоизни ҳам ташкил қилмаслиги танқид қилинган.
Изоҳ (0)