“Davlat organlari va tashkilotlarida mehnat faoliyatini olib borayotgan yosh mutaxassislar va yosh vatandoshlarga zarur shart-sharoitlar yaratish chora-tadbirlari to‘g‘risida”gi hukumat qarori qabul qilindi, deb xabar beradi Telegram’dagi “Huquqiy axborot” kanali.
Qarorga muvofiq, 2022-yil iyundan xorijdagi nufuzli OTMda o‘qiyotgan, yetakchi kompaniyalarda ishlayotgan O‘zbekiston yoshlariga (yosh vatandoshlar) vazirliklar, idoralar va tashkilotlarda ishlashi uchun shart-sharoit yaratish maqsadida:
- yosh vatandoshlar faoliyati davomida xizmat turar joylari bilan ta’minlanadi;
- davlat organlari va tashkilotlarida kamida 2 yil ishlagan yosh vatandoshlarga uy-joy uchun ipoteka kreditining dastlabki badali va foizlarning bir qismini qoplashga subsidiya beriladi.
Shuningdek, har yili 1-martgacha davlat organlari va tashkilotlari tizimidagi malakali yosh mutaxassislar va yosh vatandoshlarni kelgusida yuqori lavozimga tayinlash bo‘yicha asoslangan takliflarni Yoshlar ishlari agentligiga beradi.
Agentlik 1-aprelgacha takliflarni o‘rganib Prezident administratsiyasiga tavsiya kiritadi.
Eslatib o‘tamiz, 2021-yilning avgustida O‘zbekistonda “Vatandoshlar” jamoat fondi tashkil etilishi, fond vasiylik kengashiga Sherali Jo‘rayev raislik qilishi to‘g‘risida xabar berilgan edi.
Izoh (0)