Davlat xaridlarida eng ko‘p tanish-bilishchilik qilgan hududlar ma’lum qilindi

Navoiy, Jizzax va Andijon viloyati hokimliklari 2021-yilda eng ko‘p manfaatlar to‘qnashuviga yo‘l qo‘ygan. Bu haqda Korrupsiyaga qarshi kurashish agentligi direktori Akmal Burhonov 10-mart kuni bo‘lib o‘tgan matbuot anjumanida aytib o‘tdi, deya xabar bermoqda “Daryo” muxbiri.

Akmal Burhonovning ma’lum qilishicha, o‘tgan yil davomida respublika bo‘yicha davlat xaridlarini amalga oshirishda 200 ga yaqin manfaatlar to‘qnashuviga yo‘l qo‘yilgani aniqlangan.

“Shundan 100 dan ortig‘i bevosita manfaatlar to‘qnashuvi, amaldor davlat xaridida o‘zi ishtirok etishi mumkin bo‘lmasa-da, bunga yo‘l qo‘ygan. 73 ta holatda afillanganlik holati aniqlangan. Davlat xaridlari sohasida eng ko‘p manfaatlar to‘qnashuviga yo‘l qo‘ygan hududlar­ – Navoiy, Jizzax va Andijon viloyatlari hokimliklari bo‘lgan. Shuningdek, Moliya vazirligi va boshqa bir qancha tashkilotlar ham manfaatlar to‘qnashuviga yo‘l qo‘ygan. Biz barcha aniqlangan qonun buzilish holatlari bo‘yicha tegishli davlat idoralariga 2021-yilda 373 ta taqdimnoma kiritdik va ularning barchasi bekor qilindi”, — dedi agentlik rahbari.

Ta'kidlanishicha, manfaatlar to‘qnashuviga yo‘l qo‘ygani uchun 24 nafar amaldor ma’muriy javobgarlikka tortilgan.

“Kinematografiya agentligining mansabdor shaxslari manfaatlar to‘qnashuviga yo‘l qo‘yilgani bo‘yicha ma’muriy javobgarlikka tortilgandi. Bu muhokamalarga sabab bo‘lib, jamoatchilikka tomonidan mansabdorga birinchi marta chora ko‘rildi, deyildi. Ammo unday emas. Shu paytga qadar 24 nafar mansabdorga manfaatlar to‘qnashuviga yo‘l qo‘ygani bo‘yicha prokuratura idoralari tomonidan ma’muriy ishlar qo‘zg‘atilgan va sud tomonidan javobgarlikka tortilgan”, — dedi agentlik direktori.

Avvalroq Akmal Burhonov Kinematografiya agentligi direktori Firdavs Abduxoliqov ishi bo‘yicha izoh berib, amaldorga qo‘zg‘atilgan ma’muriy javobgarlik davlat mablag‘larini talon-taroj qilishga bog‘liq emasligini aytgandi. Shuningdek, Korrupsiyaga qarshi kurashish agentligi direktori mansabdorlarning mol-mulklari va yillik daromadlari 2022-yil oxirigacha jamoatchilikka ochiqlanishini ma’lum qilingan.