Qashqadaryoda tuman elektr tarmoqlari korxonasi rahbari sifatida ishlagan U.B. fuqaroni ishga olish uchun 400 dollar, tadbirkorga transformator o‘rnatib berish uchun 23 million so‘m olgani ma’lum bo‘ldi. Bu haqda viloyat prokuraturasi xabar berdi.
Ma’lum bo‘lishicha, Shahrisabz tuman elektr tarmoqlari korxonasi boshlig‘i lavozimida ishlab kelgan U.B. fuqaro D.E.ni ishga qabul qilish uchun undan 400 dollar pora olgan. Shuningdek, u jinoiy harakatlarini davom ettirib, fuqaro M.T.ning ishonchiga kirgan va unga tegishli xususiy korxonaga transformator o‘rnatib berishini aytib, tadbirkordan 23 million so‘m undirgan.Jinoyat ishlari bo‘yicha Kitob tumani sudi mansabdorni pora olish va firibgarlik jinoyatlarini sodir etganlikda aybdor deb topib, uni 2 yil 2 oy muddatga ozodlikdan mahrum etgan.
Qashqadaryoda, shuningdek, jazoni ijro etish koloniyasi tezkor xodimi ham 1600 dollar bilan qo‘lga tushgan.
“Viloyatdagi 10-sonli jazoni ijro etish koloniyasi tezkor xodimi B.H. koloniyada jazo o‘tayotgan mahkum M.Y.ga yengil shart-sharoitlar yaratib berish, unga uyali telefon apparati olib kirib berish evaziga 8-mart kuni 1600 dollar olayotgan vaqtida ashyoviy dalillar bilan ushlangan”, — deydi viloyat prokuraturasi mas’uli.
Qo‘shimcha qilinishicha, mazkur holat yuzasidan departamentning viloyat boshqarmasi tomonidan Jinoyat kodeksining 210-moddasi (pora olish) bilan jinoyat ishi qo‘zg‘atilib, dastlabki tergov harakatlari viloyat prokuraturasi tomonidan olib borilmoqda.
Izoh (0)