“Osmondagi bolalar” filmidagi Nargiz hozir qayerda? U nega kinodagi faoliyatini davom ettirmadi? (video)

“Osmondagi bolalar” filmidagi Nargiz obrazi bilan tomoshabinlar mehrini qozongan yosh aktrisa Malika Alimova mazkur rolidan keyin birorta filmda suratga tushmadi. U hozir qayerda hamda qanday sohada faoliyat yuritadi, degan savol ko‘pchilik kino ishqibozlarini qiziqtiradi. “Daryo” muxbiri Nargizaxon Murodova hozirgi kunda san’atga butunlay qarama-qarshi sohada ishlayotgan aktrisa bilan intervyu tashkillashtirdi.

“Osmondagi bolalar”ga tasodifan tasdiqlanganman

— “Osmondagi bolalar” filmidan avval birorta kinoda suratga tushmaganman.  2002-yili poytaxtdagi 110-maktabda tahsil olardim. Bir kuni maktabimizda rejissor Zulfiqor Musoqovning yordamchisi Alfiya opa kelib, direktorimizga film uchun chiroyli qiz kerakligini aytgan. O‘shanda men 9-sinf o‘quvchisi edim. Maktabning eng faol o‘quvchisi bo‘lganim uchun direktorimiz  oldiga chaqirib, rejissor assistentiga yordam berishimni so‘ragan. Alfiya opa meni ko‘rgach, “Bo‘ldi, boshqa qiz kerakmas, shu qizni kinoga olamiz”, degandi. Fan olimpiadalarida qatnashadigan faol o‘quvchi bo‘lganim va kinoda qatnashadigan bo‘lsam, o‘qishim sustlashishidan hayiqqan direktorimiz “Bu o‘quvchi o‘zimizga ham kerak”, degandi. Alfiya opa direktorni ko‘ndirib, kulib va jahl bilan tushgan suratimni olib ketdi. Bir necha kundan keyin “O‘zbekkino”ga borib, fotokastingda qatnashishimni aytdi. Hech kimga aytmay, kastingda ishtirok etganman.

Rolga tasdiqlangach, otam rahmatliga yotig‘i bilan aytgandim. Ammo otam tutaqib, “Yosh qizga kinoda nima bor? Hech qachon syomkalarga bormaysan”, deb qarshi bo‘lgandi. Zulfiqor Musoqovga qo‘ng‘iroq qilib, otam ruxsat bermayotganini aytganimda, qayerda ishlashi va ismi nima ekanligini so‘ragandi. “Dadam televideniyeda ishlaydi, Mumtoz Alimov” deganimda “Iya, u bilan kursdosh bo‘lganman-ku”, degandi. Xullas, otamning raqamlarini berganman va rejissor otamga hammasini yotig‘i bilan tushuntirgan. Shundan keyingina filmda suratga tushishimga ruxsat berishgan.

“Professional aktrisa bo‘lmasam-da, syomka jarayonida qiynalmaganman”

— Suratga olish jarayonida qiyinchiliklar deyarli bo‘lmagan. Chunki jamoamiz quvnoq, o‘zim singari debyutant aktyorlardan iborat edi. Biz maza qilib suratga tushganmiz. Ayniqsa, maktab sahnalari suratga olinayotganda syomka qanday o‘tganini ham sezmay qolganmiz. Zulfiqor aka ham jiddiy ko‘ringani bilan yoshlar bilan tezda til topishib ketardi. Bajarolmagan sahnamizni o‘zi ijro etib berardi.

“Otam san’at sohasidan ketishimni istagan”

— Avvalgi kinolar qiziqroq edi, hozir esa undan ko‘nglim qolgan. Bilmadim, negadir bugungi filmlar sayoz va juda oddiydek tuyuladi. Maktabni bitirgandan keyin aktrisa bo‘lish haqida ham o‘ylab ko‘rdim. Ammo otamga bergan va’dam bu sohani egallashimga to‘sqinlik qildi. Otam rahmatli “Osmondagi bolalar 2” filmi suratga olinayotganda xastalik sabab vafot etgandi. Yaqin insonidan ayrilish nihoyatda og‘ir. Men ham 17 yoshimda bu dardni his qildim. Ammo na chora. Hammasi o‘z izmiga tushib ketarkan. Otam ham ijodkor bo‘lgani uchun bu sohaning mashaqqatini va ayol kishiga qanchalik qiyin ekanligini yaxshi bilardi. Shu bois san’atkor bo‘lishimni istamasdi.

“Psixologik markazda ish yurituvchiman”

Ko‘pchilik meni xorijga ko‘chib ketgan, deb o‘ylashadi. Sayohat qilishni yaxshi ko‘raman. Ammo turmushga chiqib, ona bo‘lgach, sayohatlarim ancha kamaydi. Hozirda qizlarimning tarbiyasi bilan bandman. Shu kungacha ko‘plab tashkilotlarda reklama marketingi va tashkilotchi bo‘lib faoliyat yuritdim. Uch-to‘rt oy avval dugonam inson psixologik markazi ochishni va ruhiy jihatdan odamlarni qo‘llab-quvvatlamoqchi ekanligini aytdi. Uning iltimosiga ko‘ra, psixologik markazda ish yurituvchi bo‘lib ishlayapman.

Shaxsiy hayoti haqida

O‘zbek oilasiga kelin bo‘lganman. Turmush o‘rtog‘imning bobosi mashhur tibbiyot professori Akrom Fozilov bo‘ladi. Qaynanam ham malakali shifokor, u BMTda faoliyat yuritadi. Ularning roziligisiz suratlarini ijtimoiy tarmoqlarga qo‘yolmayman. Turmush o‘rtog‘im “Baxtingni ko‘z-ko‘z qilaverma, ko‘z tegadi”, deydi. Instagram’ga ham faqatgina bolalarning suratini joylashimga ruxsat berishadi.Otamning vafotidan so‘ng onam turmushga chiqdi. Turmush o‘rtog‘i xorijlik. Ular singlim bilan birga Yevropada istiqomat qilishadi. To‘ydan avval men ham tez-tez borib turardim. Hozir esa o‘z oilam bilan bandman.