«Осмондаги болалар» фильмидаги Наргиз ҳозир қаерда? У нега кинодаги фаолиятини давом эттирмади? (видео)

«Осмондаги болалар» фильмидаги Наргиз образи билан томошабинлар меҳрини қозонган ёш актриса Малика Алимова мазкур ролидан кейин бирорта фильмда суратга тушмади. У ҳозир қаерда ҳамда қандай соҳада фаолият юритади, деган савол кўпчилик кино ишқибозларини қизиқтиради. «Дарё» мухбири Наргизахон Муродова ҳозирги кунда санъатга бутунлай қарама-қарши соҳада ишлаётган актриса билан интервью ташкиллаштирди.

«Осмондаги болалар»га тасодифан тасдиқланганман

— «Осмондаги болалар» фильмидан аввал бирорта кинода суратга тушмаганман.  2002 йили пойтахтдаги 110-мактабда таҳсил олардим. Бир куни мактабимизда режиссёр Зулфиқор Мусоқовнинг ёрдамчиси Алфия опа келиб, директоримизга фильм учун чиройли қиз кераклигини айтган. Ўшанда мен 9-синф ўқувчиси эдим. Мактабнинг энг фаол ўқувчиси бўлганим учун директоримиз  олдига чақириб, режиссёр ассистентига ёрдам беришимни сўраган. Алфия опа мени кўргач, «Бўлди, бошқа қиз керакмас, шу қизни кинога оламиз», деганди. Фан олимпиадаларида қатнашадиган фаол ўқувчи бўлганим ва кинода қатнашадиган бўлсам, ўқишим сустлашишидан ҳайиққан директоримиз «Бу ўқувчи ўзимизга ҳам керак», деганди. Алфия опа директорни кўндириб, кулиб ва жаҳл билан тушган суратимни олиб кетди. Бир неча кундан кейин «Ўзбеккино»га бориб, фотокастингда қатнашишимни айтди. Ҳеч кимга айтмай, кастингда иштирок этганман.

Ролга тасдиқлангач, отам раҳматлига ётиғи билан айтгандим. Аммо отам тутақиб, «Ёш қизга кинода нима бор? Ҳеч қачон съёмкаларга бормайсан», деб қарши бўлганди. Зулфиқор Мусоқовга қўнғироқ қилиб, отам рухсат бермаётганини айтганимда, қаерда ишлаши ва исми нима эканлигини сўраганди. «Дадам телевидениеда ишлайди, Мумтоз Алимов» деганимда «Ия, у билан курсдош бўлганман-ку», деганди. Хуллас, отамнинг рақамларини берганман ва режиссёр отамга ҳаммасини ётиғи билан тушунтирган. Шундан кейингина фильмда суратга тушишимга рухсат беришган.

«Профессионал актриса бўлмасам-да, съёмка жараёнида қийналмаганман»

— Суратга олиш жараёнида қийинчиликлар деярли бўлмаган. Чунки жамоамиз қувноқ, ўзим сингари дебютант актёрлардан иборат эди. Биз маза қилиб суратга тушганмиз. Айниқса, мактаб саҳналари суратга олинаётганда съёмка қандай ўтганини ҳам сезмай қолганмиз. Зулфиқор ака ҳам жиддий кўрингани билан ёшлар билан тезда тил топишиб кетарди. Бажаролмаган саҳнамизни ўзи ижро этиб берарди.

«Отам санъат соҳасидан кетишимни истаган»

— Аввалги кинолар қизиқроқ эди, ҳозир эса ундан кўнглим қолган. Билмадим, негадир бугунги фильмлар саёз ва жуда оддийдек туюлади. Мактабни битиргандан кейин актриса бўлиш ҳақида ҳам ўйлаб кўрдим. Аммо отамга берган ваъдам бу соҳани эгаллашимга тўсқинлик қилди. Отам раҳматли «Осмондаги болалар 2» фильми суратга олинаётганда хасталик сабаб вафот этганди. Яқин инсонидан айрилиш ниҳоятда оғир. Мен ҳам 17 ёшимда бу дардни ҳис қилдим. Аммо на чора. Ҳаммаси ўз измига тушиб кетаркан. Отам ҳам ижодкор бўлгани учун бу соҳанинг машаққатини ва аёл кишига қанчалик қийин эканлигини яхши биларди. Шу боис санъаткор бўлишимни истамасди.

«Психологик марказда иш юритувчиман»

Кўпчилик мени хорижга кўчиб кетган, деб ўйлашади. Саёҳат қилишни яхши кўраман. Аммо турмушга чиқиб, она бўлгач, саёҳатларим анча камайди. Ҳозирда қизларимнинг тарбияси билан бандман. Шу кунгача кўплаб ташкилотларда реклама маркетинги ва ташкилотчи бўлиб фаолият юритдим. Уч-тўрт ой аввал дугонам инсон психологик маркази очишни ва руҳий жиҳатдан одамларни қўллаб-қувватламоқчи эканлигини айтди. Унинг илтимосига кўра, психологик марказда иш юритувчи бўлиб ишлаяпман.

Шахсий ҳаёти ҳақида

Ўзбек оиласига келин бўлганман. Турмуш ўртоғимнинг бобоси машҳур тиббиёт профессори Акром Фозилов бўлади. Қайнанам ҳам малакали шифокор, у БМТда фаолият юритади. Уларнинг розилигисиз суратларини ижтимоий тармоқларга қўёлмайман. Турмуш ўртоғим «Бахтингни кўз-кўз қилаверма, кўз тегади», дейди. Instagram’га ҳам фақатгина болаларнинг суратини жойлашимга рухсат беришади.Отамнинг вафотидан сўнг онам турмушга чиқди. Турмуш ўртоғи хорижлик. Улар синглим билан бирга Европада истиқомат қилишади. Тўйдан аввал мен ҳам тез-тез бориб турардим. Ҳозир эса ўз оилам билан бандман.