Andijon viloyati Ulug‘nor tumanida shaxsiy ma’lumotlarni tarqatish bilan qo‘rqitib, pul talab qilib kelgan yigit ushlandi. Bu haqda Tergov departamenti xabar qildi.
Qayd etilishicha, 7-mart kuni Ulug‘nor tumanida yashovchi J.G. (29 yoshli) tuman ichki ishlar bo‘limi boshlig‘ining nomiga ariza bilan murojaat qilgan. Unda mart oyi boshlarida Telegram orqali Andijon shahrida yashovchi Jasur ismli yigit bilan tanishib, u bilan bir necha kun suhbatlashib kelganini, suhbat davomida o‘ziga tegishli bo‘lgan ma’lumotlarni yuborganini ma’lum qilgan.
U esa ushbu ma’lumotlarni telefon apparatiga saqlab olib, ijtimoiy tarmoqlarga tarqatib, sharmanda qilish bilan qo‘rqitgan. Yigit J.G.dan 200 dollar pul mablag‘i talab qilib kelgan. Ayol unga nisbatan qonuniy chora ko‘rishni so‘ragan.
Arizaga asosan shu kuni soat 16:30 larda IIB xodimlari tomonidan tezkor tadbir o‘tkazilgan. Unda Baliqchi tumani “Oqqo‘rg‘on” mahallasida joylashgan umumiy ovqatlanish joyi kirish eshigi yo‘lagida yigit arizachidan 200 dollar olayotgan vaqtida tadbir ishtirokchilari tomonidan ashyoviy dalillar bilan ushlangan.
Olib borilgan tergovga qadar tekshiruvlar natijasida o‘zini Jasur deb tanishtirgan yigit Oltinko‘l tumani Shodlik ko‘chasida yashovchi Q.O. (19 yoshli) ekani aniqlangan.
Holat yuzasidan unga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Mavzuga doir:
- Surxondaryoda tanishiga tegishli videoni internetda tarqatmaslik uchun ming dollar so‘ragan erkak ushlandi
- Samarqandda tanishining videolarini tarqatib, sharmanda qilmaslik uchun 2 ming dollar so‘ragan ona-bola ushlandi
- Qashqadaryoda ayolning behayo videosini tarqatmaslik uchun 900 dollar va qimmatbaho buyumlar talab qilgan erkak ushlandi
Izoh (0)