Ijtimoiy tarmoqlarda endilikda bolalar 2 yoshdan bog‘chaga qabul qilinishi haqida xabarlar tarqalgandi. Ushbu xabarlar yuzasidan Maktabgacha ta’lim vazirligi munosabat bildirdi.
Qayd etilishicha, O‘zbekiston Respublikasi prezidenti Shavkat Mirziyoyev tomonidan imzolangan “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmonining 17 “b” bandiga ko‘ra, to‘liq quvvat bilan ishlamayotgan davlat maktabgacha ta’lim tashkilotlariga 2 yoshdan 3 yoshgacha bo‘lgan bolalarni pullik xizmat ko‘rsatish shaklida qabul qilishga ruxsat beriladi.
“Maktabgacha ta’lim tashkiloti tomonidan ko‘rsatilishi rejalashtirilayotgan qo‘shimcha xizmatlar turlari hamda ular uchun belgilanadigan to‘lovlar miqdori maktabgacha ta’lim tashkilotining kuzatuv kengashi yig‘ilishida muhokama qilinadi.
Maktabgacha ta’lim tashkilotlari tomonidan ko‘rsatiladigan qo‘shimcha xizmatlarning narxlar preyskuranti tegishli maktabgacha ta’lim tuman (shahar) bo‘linmasi bilan kelishilgan holda maktabgacha ta’lim tashkilotining direktori tomonidan tasdiqlanadi”, – deyiladi vazirlik xabarida.
Avvalroq Toshkentda o‘tkazilgan matbuot anjumanida Maktabgacha ta’lim vazirligi bo‘lim boshlig‘i Bahrom Xidirboyev hozirgi vaqtda asosiy vazifalardan biri bog‘chalarga 3 yoshdan 7 yoshgacha bo‘lgan bolalarni qamrab olishdan iborat ekanini ma’lum qilgandi.
“Bu vazifani to‘liq amalga oshirgach, ya’ni 80 foizga yetkazgandan keyin (hozir 71 foiz) 2 yoshlilar masalasi ham ko‘rib chiqiladi. Xorijlik ekspertlar tahlillariga ko‘ra, bola 3 yoshgacha onasi bilan bo‘lishi uning ruhiy rivojlanishiga juda yaxshi ta’sir qiladi. Rivojlangan davlatlarda ham bolalar 3 yoshdan bog‘chaga qabul qilinadi”, — degandi u.
Izoh (0)