Surxondaryoda Facebook ijtimoiy tarmog‘ida “Oxirat hisobi” nomli profil orqali aqidaparastlikni targ‘ib qiluvchi videolar tarqatib kelgan shaxs qo‘lga olindi, deb xabar beradi O‘zA.

DXX Surxondaryo viloyati boshqarmasi hamda viloyat ichki ishlar boshqarmasi hamkorligida o‘tkazilgan tadbirda profil egasi Surxondaryo viloyati Jarqo‘rg‘on tumani “Ulug‘bek” mahallasida yashovchi fuqaro B.A. ekani aniqlangan.

Uning profilida noma’lum ijrochiga tegishli bo‘lgan “Nasheed – axi anta xurrun” (“Brat, ti svoboden”) nomli video tarqatilgan. Yana bir video “Mavla va qud” (“Mavlaya kod nashida”) deb nomlangan.

Shuningdek, B.A.ning telefon raqamiga ochilgan Telegram akkaunti orqali ham “Uch xil odamning ibodati qabul bo‘lmaydi” nomli Rashodxon domlaning ma’ruzasi tarqatilgan.

Vazirlar Mahkamasi huzuridagi Din ishlari bo‘yicha qo‘mitaning xulosasida B.A. tomonidan tarqatilgan materiallar aqidaparastlik g‘oyalariga yo‘g‘rilgan bo‘lib, ularni O‘zbekiston hududiga olib kirish, tayyorlash va tarqatish taqiqlangani ko‘rsatilgan.

Mazkur holat yuzasidan fuqaro B.A.ga Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandiga muvofiq jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Sirdaryoda xalqaro terroristik tashkilotga a’zoligi uchun qamalgan mahkum qamoqxonadan turib ekstremistik guruh tuzgani aniqlangan edi.