2022-yil yakunigacha davlat xizmatchilarining joriy yildagi daromadlari va mol-mulklari deklaratsiyasi jamoatchilikka ochiqlanishi kutilmoqda. Bu haqda Korrupsiyaga qarshi kurashish agentligi direktori Akmal Burhonov 10-mart kuni Toshkent shahrida o‘tkazilgan matbuot anjumanida ma’lum qildi, deya xabar bermoqda “Daryo” muxbiri.
2021-yil 6-iyunda imzolangan O‘zbekiston prezidenti farmonida 2022-yil 1-yanvardan davlat xizmatchilarining daromadlari va mol-mulkini deklaratsiya qilish belgilangan. Akmal Burhonovning aytishicha, qonunchilik jarayonida cho‘zilish bo‘lgani sababli ma’lumotlarni ochiqlash kechikmoqda.
“Hozirda bu bo‘yicha qonun loyihasi tayyor. Uni jamoatchilik muhokamasiga qo‘yamiz. 2022-yil 1-yanvardan davlat xizmatchilarining mol-mulklari va daromadlari deklaratsiya qilinadi hamda joriy yil yozida yoki yil oxirigacha jamoatchilikka ochiqlanadi. Agentlik xalqaro tashkilotlar, vazirlik va idoralar ko‘magida e’lonlar uchun maxsus platforma ishlab chiqmoqda. Texnik reglament ishlab chiqilgan. Davlat xizmatchilarining daromadlari va mol-mulklarini hisobga olish ham allaqachon boshlangan. Faqat huquqiy asosi va texnik reglament tasdiqlanishi kerak. Deklaratsiyani 1-apreldan e’lon qilmoqchi edik, lekin ulgurmayapmiz”, — dedi agentlik rahbari.
Akmal Burhonovning qo‘shimcha qilishicha, 2021-yil iyundagi prezident qarori bilan mahalliy hokimliklar budjetdan orttirilgan mablag‘lar miqdorini va pullar qayerga sarflanayotganini e’lon qila boshlagan. Buning natijasida mablag‘ sarflashda samaradorlik ortdi.
“Qaror e’lon qilgandan so‘ng ko‘rdikki, avtomobil sotib olish, hokimiyatni ta’mirlash va boshqalarga yo‘naltiriladigan sarf-xarajatlar keskin kamaydi. Endilikda ortgan mablag‘lar ijtimoiy infrastrukturaga sarflanganini ko‘rish mumkin. Chunki hammasi ochiq bo‘lyapti. O‘ylaymanki, ma’lumotlarni ochiqlash majburiy qilindi, endi ochiqlamaganlik uchun javobgarlik belgilansa, samaradorlik yanada oshadi”, — dedi Antikorrupsiya agentligi direktori.
Izoh (0)