Qashqadaryo viloyatining Shahrisabz, Qamashi, Dehqonobod, Yakkabog‘ va Kitob tumanlarida 9-mart kuni soat 09:00 dan 12:00 ga qadar kuchli shamol esishi va yog‘ingarchilik qayd etildi. Bu haqda Favqulodda vaziyatlar vazirligi xabar qildi.
Qayd etilishicha, noqulay ob-havo natijasida viloyatning bir nechta tumanlarida girometeorologik xavfli jarayonlar yuzaga keldi. Jumladan:
- soat 11:03 larda Shahrisabz tumani “Chorshanbi” qo‘rg‘onidagi oziq-ovqat savdo do‘konining tom qoplamasini shamol uchirib yuborgan;
- soat 11:25 larda Qamashi tumani “A.Navoiy” MFYda joylashgan yelim idishlarni yig‘ish punktining tom qoplamasi kuchli shamolda qulab tushgan. Voqea oqibatida uch nafar fuqaro turli darajada jabrlanib, tuman tibbiyot birlashmasiga murojaat qilgan;
- soat 11:48 larda kuzatilgan shamol Yakkabog‘ tumani “Uchtepa” MFY, Tosh qishlog‘idagi uyning, “Navro‘z” MFY, Navro‘z qishlog‘idagi ikkita xonadonning qo‘shimcha binolaridagi tom qoplamalarini uchirgan;
- soat 11:50 larda Kitob tumani Qaynar, Motmon va Qavzixona qishloqlari hududidagi 4 dona elektr simyog‘ochi hamda “Tepaboshi” MFY hududida 1 ta yashash uyining tom qismi kuchli shamol natijasida qulab tushgan.
Respublikaning qolgan hududlarida, xususan, Jizzax, Navoiy, Sirdaryo va Toshkent viloyatlarida qisqa muddatli yog‘ingarchiliklar kuzatilmoqda.
“Ko‘ngilsiz vaziyatlarga tushib qolmaslik uchun xavfsizlik qoidalariga rioya qiling”, — deyiladi xabarda.
Eslatib o‘tamiz, “O‘zgidromet” Erondan va Kaspiy dengizi hududlaridan bir qator nam havo massalari kirib kelishi hisobiga ish haftasining oxirigacha respublika hududlari bo‘yicha beqaror ob-havo saqlanib turishini ma’lum qilgandi. Shuningdek, “O‘zgidromet” Toshkentda yaqin 2 soat ichida kuchli momaqaldiroq kuzatilib, shamol tezligi kuchayishidan ogohlantirgan.
9-mart kuni soat 11:45 da Qashqadaryo viloyati Dehqonobod tumani “Otkamar” MFYda noqulay ob-havo sharoiti natijasida 3 nafar fuqaroni yashin urdi. Ulardan biri vafot etdi, ikki nafar fuqaroga tibbiy yordam ko‘rsatildi.
Keyinroq yashin urgan 3 nafar fuqaro bir oila vakillari ekani ma’lum bo‘ldi. Vafot etgan erkak 63 yoshda bo‘lgan. Uning jarohat olgan 37 yoshli va 42 yoshli o‘g‘illari esa ayni paytda shifoxonada davolanmoqda.
Izoh (0)