O‘zbekiston Jinoyat kodeksining ikkita moddasi bank kartalaridan pul mablag‘larini o‘g‘irlashni og‘irlashtiruvchi holat sifatida javobgarlikni belgilovchi norma bilan to‘ldirilmoqda. Bu haqda Oliy Majlis Qonunchilik palatasi matbuot xizmati xabar berdi.
Bugungi kunda bank plastik kartochkalaridan pul mablag‘larini o‘g‘irlik yo‘li bilan talon-toroj qilish holatlari Jinoyat kodeksining 169-moddasi (o‘g‘rilik) bilan malakalanadi.
Ta’kidlanishicha, ko‘p hollarda fuqarolarning bank plastik kartochkalaridan oz miqdorda talon-toroj qilinayotgani sababli ushbu qilmishga Jinoyat kodeksi 169-moddasining 1-qismi bilan ayb e’lon qilinadi. Bu o‘z navbatida, aybdor shaxslarga nisbatan yetarlicha jazo choralarining qo‘llanilmayotganiga, ularning axloqan tuzalish yo‘liga o‘tmayotganiga, takroran jinoiy faoliyat bilan shug‘ullanishiga olib kelmoqda.
Shu jihatdan, bu kabi qilmishlar uchun Jinoyat kodeksining 168 va 169-moddalarini og‘irlashtiruvchi holat sifatida javobgarlikni belgilovchi norma bilan to‘ldirish taklif qilinmoqda.
“Qonun loyihasining qabul qilinishi kelgusida jismoniy va yuridik shaxslarning elektron pul mablag‘larini yashirin ravishda talon-toroj qilish, fuqarolarning ishonchiga kirib uning hisob raqami yoki plastik kartasidagi pul mablag‘larini o‘g‘irlash holatlarining oldini olishga xizmat qiladi”, — deyiladi xabarda.
Ma’lumot uchun, jazoni og‘irlashtiruvchi holatlar — sodir etilgan jinoyatning va jinoyat sodir etgan shaxsning ijtimoiy xavflilik darajasini oshiruvchi hamda og‘irroq jazo tayinlashga asos bo‘ladigan holatlardir.
Avvalroq Farg‘onada bankning mobil ilovasidagi texnik xatolikdan foydalanib, qariyb 700 mln so‘m pulni o‘g‘irlagan shaxslar ushlangani, Buxoroda og‘ir kasal ekanini aytib, fuqaro ishonchiga kirgan va uning plastik kartochkasidan salkam 1 mln so‘m yechib olgan qizga jinoyat ishi ochilgani to‘g‘risida xabar berilgandi.
Izoh (0)