Andijon shahar Xalq ta’limi bo‘limi Markazlashgan buxgalteriya xizmati hisobchisi 11 hamda 16-sonli umumta’lim maktablarida ishlamagan kishilarga soxta ma’lumotlar asosida jami 527 million so‘mga yaqin pullarni hisoblab, mablag‘larni talon-toroj qilgani aniqlandi. Bu haqda “Mening yurtim” telekanalining “Markaziy studiya” dasturida ma’lum qilindi.
Yana bir holatda esa hisobchi o‘qituvchilardan biriga tug‘uruq ta’tili uchun 13,5 million so‘mdan ko‘proq pullarni tushirib, “6,5 million so‘m ortiqcha to‘lab berganim uchun 3,5 millionini qaytaring” mazmunida gap aytgan. Bundan tashqari, u ushbu o‘qituvchiga ishlamagan vaqtida 800 ming avans ham o‘tkazib berganini ta’kidlab, jami 4,3 million so‘m berishini talab qilgan.
Hisobchi pullarni olayotgan vaqtida ushlangan. Jinoyat ishlari bo‘yicha Marhamat tuman sudi hisobchi Obidovani 2 yil muddatga muayyan huquqdan mahrum qilib, 2 yil axloq tuzatish ishlari jazosini tayinlagan.
Shuningdek, Surxondaryo viloyati perinatal markazi bosh hisobchisi lavozimida 2015-yildan buyon ishlab kelgan T.A. hisobchi va g‘aznachi bilan til biriktirgan holda, markazda mehnat shartnomasi bekor qilingan kishilarning ro‘yxatini tuzib chiqqan. Ularning nomiga plastik kartalar ochilib, ish haqi va unga tenglashtirilgan to‘lovlardan jami 772 million so‘m o‘tkazilgan. Keyingi holatda esa salkam 92 million so‘m rabg‘at pullari haqida hujjat soxtalashtirib, 13 million so‘m xizmat safari uchun deya yana 92 million so‘mni o‘zlashtirib olgan.
Sud hukmiga ko‘ra bosh hisobchi 5 yil 6 oyga ozodlikdan mahrum etilgan, uning sheriklaridan biriga 5 yil 1 oy, g‘aznachiga esa oylik ish haqining 20 foizini davlat hisobiga ushlab qolgan holda 2 yil muddatga axloq tuzatish ishlari jazosi tayinlangan.
Avvalroq Toshkentda o‘zi ishlaydigan korxonaning 160 mln so‘mdan ortiq mablag‘ini talon-toroj qilgan bosh hisobchi ushlangani, Sirdaryo va Surxondaryoda jami 4 mlrd so‘m kredit mablag‘larini talon-toroj qilgan rahbarlar qo‘lga olingani to‘g‘risida xabar berilgandi.
Izoh (0)