Toshkent shahrida bir necha kundan buyon davom etayotgan yog‘ingarchilik poytaxt aholisi uchun qator noqulayliklar tug‘dirmoqda. Xususan, ayrim ko‘chalarda to‘planib qolayotgan suv haydovchi va yo‘lovchilar harakatini murakkablashtirmoqda. “Daryo” muammoni bartaraf etish ishlari qay darajada bajarilayotganini aniqlash maqsadida Toshkent shahar hokimligidan izoh oldi.
Hokimlik tomonidan suv toshishi, yo‘llarda suv to‘planishini bartaraf etish uchun 1 ming 50 nafarga yaqin xodim va 53 ta maxsus texnikalar jalb qilingan.
“Amir Temur shoh ko‘chasi, ‘Mirobod’ dehqon bozori, Chilonzor tumanidagi ‘Shuhrat’ chorrahasida suv to‘planishi holatlariga sabab — shahrimiz aholisi tomonidan yo‘llarga tashlab ketilayotgan chiqindilardir. Shu o‘rinda, yurtdoshlarimizdan yashab turgan shahrimizga e’tiborli bo‘lish, chiqindilarni faqat belgilangan joylarga tashlashlarini iltimos qilamiz”, — deyiladi poytaxt hokimligi izohida.
Toshkent shahar hokimligining ma’lum qilishicha, ba’zi drenaj quvurlari belgilangan me’yorlardan ortiq yog‘ingarchilikka mo‘ljallanmagan.
“Shu sababli kelgusida bunday holatlarning oldini olish uchun, ularni yangilash va kattaroq diametrga ega quvurlarga almashtirish rejasi ishlab chiqilmoqda”, — deyiladi axborotda.
“O‘zgidromet” mart oyining birinchi o‘n kunligida O‘zbekistonda yomg‘ir yog‘ishi haqida xabar bergandi. Xususan, 9-mart kuni Toshkent shahrida havo o‘zgarib turishi va vaqti-vaqti bilan yomg‘ir yog‘ishi aytilgan edi.
Izoh (0)