Тошкент шаҳрида бир неча кундан буён давом этаётган ёғингарчилик пойтахт аҳолиси учун қатор ноқулайликлар туғдирмоқда. Хусусан, айрим кўчаларда тўпланиб қолаётган сув ҳайдовчи ва йўловчилар ҳаракатини мураккаблаштирмоқда. «Дарё» муаммони бартараф этиш ишлари қай даражада бажарилаётганини аниқлаш мақсадида Тошкент шаҳар ҳокимлигидан изоҳ олди.
Ҳокимлик томонидан сув тошиши, йўлларда сув тўпланишини бартараф этиш учун 1 минг 50 нафарга яқин ходим ва 53 та махсус техникалар жалб қилинган.
«Амир Темур шоҳ кўчаси, ‘Миробод’ деҳқон бозори, Чилонзор туманидаги ‘Шуҳрат’ чорраҳасида сув тўпланиши ҳолатларига сабаб — шаҳримиз аҳолиси томонидан йўлларга ташлаб кетилаётган чиқиндилардир. Шу ўринда, юртдошларимиздан яшаб турган шаҳримизга эътиборли бўлиш, чиқиндиларни фақат белгиланган жойларга ташлашларини илтимос қиламиз», — дейилади пойтахт ҳокимлиги изоҳида.
Тошкент шаҳар ҳокимлигининг маълум қилишича, баъзи дренаж қувурлари белгиланган меъёрлардан ортиқ ёғингарчиликка мўлжалланмаган.
«Шу сабабли келгусида бундай ҳолатларнинг олдини олиш учун, уларни янгилаш ва каттароқ диаметрга эга қувурларга алмаштириш режаси ишлаб чиқилмоқда», — дейилади ахборотда.
«Ўзгидромет» март ойининг биринчи ўн кунлигида Ўзбекистонда ёмғир ёғиши ҳақида хабар берганди. Хусусан, 9 март куни Тошкент шаҳрида ҳаво ўзгариб туриши ва вақти-вақти билан ёмғир ёғиши айтилган эди.
Изоҳ (0)