Yangi tashkil etilgan tuzilmalar — Mahalla va nuroniylarni qo‘llab-quvvatlash vazirligi va Oila va xotin-qizlar davlat qo‘mitasida tayinlovlar amalga oshirildi. Bu haqda Telegram’dagi “Nigoh” kanali xabar qildi.
Qayd etilishicha, Sodiqjon Turdiyev, Abdulla Tursunov va Muxtar Muxitdinov mahalla va nuroniylarni qo‘llab-quvvatlash vazirining birinchi o‘rinbosari lavozimlariga tayinlangan. Turdiyev bungacha u mahalla va oilani qo‘llab-quvvatlash vazirining o‘rinbosari bo‘lgan. Tursunov Prezident administratsiyasi mas’ul xodimi sifatida, Muxitdinov esa Toshkent shahar hokimining o‘rinbosari sifatida faoliyat yuritgan.
Shuningdek, Oila va xotin-qizlar davlat qo‘mitasi raisining o‘rinbosarlari ham tayinlangan. Ozoda Parpibayeva qo‘mita raisining birinchi o‘rinbosari, Ra’no Turdiboyeva va Nodira Egamberdiyeva rais o‘rinbosarlari bo‘ldi.Eslatib o‘tamiz, mart oyi boshida prezident farmoniga asosan Oila va xotin-qizlar davlat qo‘mitasi tuzilishi munosabati bilan Mahalla vazirligi nomi o‘zgartirilib, Mahalla va nuroniylarni qo‘llab-quvvatlash vazirligi sifatida qayta tashkil etilgan. O‘shanda Tursinxon Xudoyberganov mahalla vaziri lavozimiga tayinlangan.
Xotin-qizlar va oila ishlari qo‘mitasi rahbarligiga esa Zulayho Mahkamova nomzodi deputatlar tomonidan ma’qullangan. Shavkat Mirziyoyev 1-mart kungi videoselektor yig‘ilishida Mahkamovani yangi lavozimga tayinladi.U 2020-yilning martidan buyon Namangan viloyati To‘raqo‘rg‘on tumani hokimi lavozimida faoliyat yuritib kelayotgandi.
Shavkat Mirziyoyev tayinlovga izoh berib, “Men ko‘pdan beri niyat qilib yurardim, shu lavozimga qishloqdan kelsa, yerni bilsa, haqiqatni bilsa, hozirgi islohotlarimizni qadriga yetsa va ayollarni orqasidan ergashtiradigan rahbar kerak edi”, — degan edi.
Izoh (0)