2022-yilning 15-martidan boshlab Tojikiston—O‘zbekiston davlat chegarasidagi nazorat-o‘tkazish punktlari faoliyati odatdagi ish rejimiga o‘tkaziladi, deb xabar beradi “Dunyo” agentligi.
Ma’lum qilinishicha, yuqumli kasalliklar nazorati faqat COVID-19 infeksiyasiga qarshi to‘liq emlanganlik to‘g‘risidagi guvohnomani taqdim etish asosida, ya’ni Tojikiston hududida koronavirus infeksiyasi bo‘yicha virusologik tekshiruvsiz amalga oshiriladi.
“Xovar” Tojikiston Milliy axborot agentligi tarqatgan xabarda qayd etilishicha, ushbu qaror mamlakatda COVID-19 yuqumli kasalligi tarqalishining oldini olish bo‘yicha Respublika shtabi tomonidan qabul qilingan.
“Bu qaror Tojikistonda epidemiologik vaziyatni yumshatish hisobga olingan holda va mamlakatdagi iqtisodiy hududlarning to‘laqonli ishlashini ta’minlash, iqtisodiyotni qo‘llab-quvvatlash, qo‘shni davlatlar bilan iqtisodiy va ijtimoiy aloqalarni yanada mustahkamlash maqsadida qabul qilindi”, — deyiladi xabarda.
Ushbu hujjatga ko‘ra, O‘zbekiston sog‘liqni saqlash organlari va muassasalari, shuningdek, MDHning boshqa davlatlari tomonidan COVID-19’ga qarshi emlanganlik to‘g‘risidagi sertifikatlar rasman tan olinadi.
Aholi orasida COVID-19 infeksiyasi tarqalishining oldini olish maqsadida himoya niqoblaridan foydalanish yuzasidan joriy etilgan majburiy tartib ham bekor qilingan. Qarorga binoan, to‘ylar, bayramlar va boshqa milliy marosimlar amaldagi qonunchilikka muvofiq o‘tkazilishi mumkin.
Eslatib o‘tamiz, yanvar o‘rtalarida Tojikiston omikron shtammi sabab O‘zbekiston bilan chegarada nazoratni kuchaytirgandi. Unga ko‘ra, Tojikistonga O‘zbekistondan kelayotgan fuqarolarning PZR-testi manfiy bo‘lishiga qaramay, nazorat-o‘tkazish punktlarida ularning tomoq va burunlaridan koronavirusga tekshirish uchun surtma olinishi belgilangan edi. Mart boshlarida esa rasmiy Toshkent va Dushanbe qo‘shni hududda yaqin qarindoshlari vafot etgan yoki og‘ir kasal bo‘lib qolgan ikki respublika fuqarolarining chegaralar orqali erkin harakat qilishiga ruxsat berish borasida kelishib olgani xabar qilingandi.
Izoh (0)