7-mart kuni Oliy Majlis Senatining Axborot siyosati va davlat organlarida ochiqlikni ta’minlash masalalari qo‘mitasi majlisi bo‘lib o‘tdi. Bu haqda parlament yuqori palatasi matbuot xizmati xabar berdi.
Majlisda Senatning navbatdagi yalpi majlisida ko‘rib chiqilishi rejalashtirilgan masalalar dastlabki tarzda muhokama qilingan. Xususan, senatorlar yangi tahrirdagi “Reklama to‘g‘risida”gi qonunga e’tibor qaratgan.
Ta’kidlanishicha, amaldagi qonunchilik hujjatlarida umumiy tusga ega bo‘lgan va ishlamaydigan normalar mavjudligi, ular reklama faoliyati bilan bog‘liq munosabatlarni to‘liq qamrab olmagani huquqni qo‘llash amaliyotida ko‘plab huquqbuzarliklar sodir etilishiga sabab bo‘lmoqda.
Birgina 2021-yilda reklama sohasida 15 486 ta qonun buzarlik holati aniqlangan. Jumladan, tashqi reklama va boshqa reklamalarda 10 249 ta, daraxtlardagi reklama va e’lonlarda 3416 ta, dori-darmon va biologik faol qo‘shimchalar reklamasida 658 ta, tamaki va alkagol mahsuloti reklamasi 499 ta, bukmekerlik va totalizatorlar xizmatlari reklamasi 260 ta, madaniy meros obyektlari bo‘yicha 150 ta, xususiy ta’lim va tibbiyot muassasalari 110 ta, rag‘batlantiruvchi konkurs va aksiyalar 103 ta holat qayd etilgan.
Yangi tahrirdagi qonunga qonunosti hujjatlar normalari ham kiritilgan. Qonunga amaliyot va xorijiy tajriba tahlili asosida rag‘batlantiruvchi reklama aksiyalarini tashkil etish va o‘tkazishga oid normalar kiritilgan. Xususan, tegishli mukofot fondisiz rag‘batlantiruvchi reklama aksiyalarini o‘tkazish taqiqlanmoqda.
Shuningdek, O‘zbekiston hududida reklama davlat tilida tarqatilishi, qo‘shimcha ravishda uning tarjimasi boshqa tillarda takrorlanishi mumkinligi belgilanmoqda. Qonunchilik va huquqni qo‘llash amaliyoti hamda xorijiy tajribadan kelib chiqqan holda reklamaga qo‘yiladigan talablar kuchaytirilib, yangi normalar kiritilyapti.
Bundan tashqari, darsliklar va daftarlarda reklama joylashtirish, reklama narxlarini xorijiy valyutada ko‘rsatish, axloq va ma’naviyatning umumqabul qilingan normalariga zid keluvchi shakl, ibora va obrazlardan foydalanish, tovarning asosiy xususiyatlari to‘g‘risidagi ma’lumotlarni iste’molchidan yashirish taqiqlanmoqda.
Shuningdek, ayrim turdagi reklama vositalari orqali reklama tarqatishning o‘ziga xos xususiyatlari belgilanyapti. Jumladan, telekanallar efirida tarqatilayotgan reklamaning umumiy davomiyligi ko‘rsatuv vaqtining bir soati uchun yigirma foizdan, biroq bir sutkada ko‘rsatuv vaqtining o‘n besh foizidan oshishi mumkin emas. Davomiyligi o‘n daqiqadan kam bo‘lgan teleko‘rsatuvlarni reklama bilan uzib qo‘yishga va reklama bilan birga namoyish etishga yo‘l qo‘yilmaydi.
Qonunning yana bir muhim jihati ona sutining o‘rnini bosuvchi mahsulotlarni reklama qilish taqiqlanmoqda.
Senatorlar muhokama jarayonida qonunda bayon etilgan ayrim moddalarning amaliyotga tatbiq etilishi bilan bog‘liq holatlarga ham e’tibor qaratgan. Majlisda kun tartibidagi masalalar yuzasidan qo‘mitaning tegishli qarori qabul qilingan.
Avvalroq O‘zbekistonda 2021-yilda totalizator va bukmekerlikni reklama qiluvchi 30 dan ortiq sayt bloklangani to‘g‘risida xabar berilgandi.
Izoh (0)