Kanada Deripaska, Peskov, Solovyov, Simonyan, Ernst va boshqa rossiyaliklarga nisbatan sanksiyalar qo‘lladi

Kanada Rossiya rahbariyatiga yaqin bo‘lgan 10 nafar shaxsga nisbatan Ukrainadagi maxsus harbiy operatsiyalar sabab sanksiyalar qo‘lladi. Kanada bosh vaziri Jastin Tryudoning qayd etishicha, ro‘yxatdagi shaxslar oqlash mumkin bo‘lmagan hujumga bevosita aloqador, deb yozmoqda “Kommersant”.

Kanadaning taqiqlar ro‘yxatiga quyidagi shaxslar kiritilgan:

• Dmitriy Peskov (Rossiya prezidentining matbuot kotibi);
• Vladimir Solovyov (teleboshlovchi, propagandachi);
• Maragarita Simonyan (RT nashri bosh muharriri);
• Konstantin Ernst (“Perviy kanal” bosh direktori);
• Oleg Deripaska (biznesmen);
• Mixail Murashko (Rossiya sog‘liqni saqlash vaziri);
• Dmitriy Patrushyev (Rossiya qishloq xo‘jaligi vaziri);
• Pavel Krasheninnikov (Rossiya davlat dumasining davlat qurilishi va qonunchilik masalalari qo‘mitasi raisi);
• Viktor Gavrilov (Rossiya Federal xavfsizlik xizmati xodimi);
• Dmitriy Ivanov (Rossiya Federal xavfsizlik xizmati xodimi).

Jastin Tryudo sanksiyalarga uchragan besh nafar shaxsning ism-shariflari qamoqxonada hibsda saqlanayotgan rossiyalik muxolifatchi Aleksey Navalniy tomonidan tuzilgan ro‘yxatdan olingan. Kanada bosh vaziri bu borada aniq ismlar haqida gapirmagan.

“Sanksiyalar Rossiya rahbariyatiga, jumladan, Putin atrofidagilarga bo‘lgan bosimni oshiradi. Bu biz avvalroq e’lon qilgan boshqa sanksiyalarga, xususan, Rossiya hamda Belarus importi tariflariga aloqador taqiqlarga qo‘shimcha”,— deya qayd etgan Tryudo.

Kanada o‘tgan haftada Ukrainada boshlangan urush tufayli Rossiya va Belarus bilan alohida savdo maqomini bekor qilgan, bu tariflarda 35 foizlik o‘zgarishlarga olib kelgandi. Shuningdek, Rossiya tashqi ishlar vaziri Sergey Lavrov, moliya vaziri Anton Siluanov, mudofaa vaziri Sergey Shoygu, adliya vaziri Konstantin Chuychenko va prezident ma’muriyati rahbari Anton Vaynoga nisbatan sanksiyalarni tasdiqlagan.

Bundan oldin AQSh, Yevropa Ittifoqi, Buyuk Britaniya, Yaponiya va Yangi Zelandiya ham Rossiya prezidentiga qarshi sanksiyalar e’lon qilgandi. AQSh Peskov, Usmonov, Rotenberglar va ularning oila a’zolariga qarshi sanksiyalar joriy etgan.