Канада Дерипаска, Песков, Соловьёв, Симонян, Эрнст ва бошқа россияликларга нисбатан санкциялар қўллади

Канада Россия раҳбариятига яқин бўлган 10 нафар шахсга нисбатан Украинадаги махсус ҳарбий операциялар сабаб санкциялар қўллади. Канада бош вазири Жастин Трюдонинг қайд этишича, рўйхатдаги шахслар оқлаш мумкин бўлмаган ҳужумга бевосита алоқадор, деб ёзмоқда «Коммерсантъ».

Канаданинг тақиқлар рўйхатига қуйидаги шахслар киритилган:

• Дмитрий Песков (Россия президентининг матбуот котиби);
• Владимир Соловьёв (телебошловчи, пропагандачи);
• Марагарита Симонян (РT нашри бош муҳаррири);
• Константин Эрнст («Первий канал» бош директори);
• Олег Дерипаска (бизнесмен);
• Михаил Мурашко (Россия соғлиқни сақлаш вазири);
• Дмитрий Патрушев (Россия қишлоқ хўжалиги вазири);
• Павел Крашенинников (Россия давлат думасининг давлат қурилиши ва қонунчилик масалалари қўмитаси раиси);
• Виктор Гаврилов (Россия Федерал хавфсизлик хизмати ходими);
• Дмитрий Иванов (Россия Федерал хавфсизлик хизмати ходими).

Жастин Трюдо санкцияларга учраган беш нафар шахснинг исм-шарифлари қамоқхонада ҳибсда сақланаётган россиялик мухолифатчи Алексей Навальний томонидан тузилган рўйхатдан олинган. Канада бош вазири бу борада аниқ исмлар ҳақида гапирмаган.

«Санкциялар Россия раҳбариятига, жумладан, Путин атрофидагиларга бўлган босимни оширади. Бу биз аввалроқ эълон қилган бошқа санкцияларга, хусусан, Россия ҳамда Беларусь импорти тарифларига алоқадор тақиқларга қўшимча»,— дея қайд этган Трюдо.

Канада ўтган ҳафтада Украинада бошланган уруш туфайли Россия ва Беларусь билан алоҳида савдо мақомини бекор қилган, бу тарифларда 35 фоизлик ўзгаришларга олиб келганди. Шунингдек, Россия ташқи ишлар вазири Сергей Лавров, молия вазири Антон Силуанов, мудофаа вазири Сергей Шойгу, адлия вазири Константин Чуйченко ва президент маъмурияти раҳбари Антон Вайнога нисбатан санкцияларни тасдиқлаган.

Бундан олдин АҚШ, Европа Иттифоқи, Буюк Британия, Япония ва Янги Зеландия ҳам Россия президентига қарши санкциялар эълон қилганди. АҚШ Песков, Усмонов, Ротенберглар ва уларнинг оила аъзоларига қарши санкциялар жорий этган.