2002-yilda ilk marotaba 120 nafar talaba bilan faoliyat boshlagan Toshkentdagi xalqaro Vestminster universiteti 4-mart kuni Alisher Navoiy nomidagi davlat akademik katta teatrida o‘zining 20 yilligini nishonladi, deb xabar bermoqda “Daryo” muxbiri.
Ma’lum bo‘lishicha, 2021/2022-o‘quv yilida Toshkentdagi xalqaro Vestminster universitetiga 5 mingdan ortiq talaba o‘qishga qabul qilingan.
“2002-yilda universitet kichkina bo‘lgan. Biz katta yutuqlarga erisha olamizmi, deb o‘ylaganmiz. Lekin mana 20 yil ichida 5 000 nafar bitiruvchini chiqardik. Bizda ijtimoiy muhit rivojlangan. Talabalar nafaqat darslar, balki turli to‘garaklarda ham faol. Talabalar tashabbusi bilan ko‘plab to‘garaklar yo‘lga qo‘yilgan. Biz talabalarning fikrini eshitamiz va hamisha qo‘llab-quvvatlaymiz. Kelgusida yanada kengayishni, yangi fanlar kiritishni rejalashtiryapmiz”, — deydi universitetning yoshlar masalalari bo‘yicha prorektori Nizomjon Qodirov.
Ta’kidlanishicha, hozirgi kunda universitetda 5 ta bakalavriat hamda 8 ta aspirantura kurslari tashkil etilgan.
Qayd etilishicha, hozirda universitet Koreya, Germaniya, Angliya va Amerikadagi turli nufuzli universitetlar bilan memorandum tuzgan. Keyinchalik ushbu universitetlar bilan qo‘shma dasturlar ham ochilishi ko‘zda tutilgan.
Izoh (0)