Sirdaryoda xalqaro terroristik tashkilotga a’zoligi uchun qamalgan mahkum qamoqxonadan turib ekstemistik guruh tuzgani aniqlandi

“Tavhid va jihod katibasi” xalqaro terroristik tashkilotiga a’zoligi uchun 6 yilga ozodlikdan mahrum etilgan shaxs qamoqxonada turib ekstemistik guruh tuzgani aniqlandi, deb xabar beradi O‘zA.

Ma’lum qilinishicha, 2020-yildan buyon Guliston tumanidagi manzil koloniyada jazo o‘tayotgan P.S. (1991-yilda tug‘ilgan) to‘g‘ri xulosa chiqarmasdan, pinhona ravishda boshqa mahkumlarga hamda ozodlikdagi tanishlariga ekstremistik va aqidaparastlik ruhidagi materiallarni tarqatib kelgan.

U respublikaning turli viloyatlaridagi jazoni ijro etish manzil koloniyalarida saqlanayotgan 20 nafar mahkum va 11 nafar ozodlikda yurgan fuqaro bilan aloqada bo‘lib, buzg‘unchi g‘oyalar targ‘iboti bilan shug‘ullangan va kelajakda Suriyadagi jangarilar safiga chiqib ketishni rejalashtirgan.

DXX va IIV Sirdaryo viloyati bo‘yicha boshqarmalari hamkorligida prokuror sanksiyasiga asosan, 31 nafar fuqaroning jazoni o‘tash va yashash manzillarida tezkor-tergov harakatlari amalga oshirilgan.

Aniqlangan ashyoviy dalillar va elektron tashuvchi moslamalarda saqlangan materiallarda aqidaparastlik g‘oyalari mavjudligi xususida Vazirlar Mahkamasi huzuridagi Din ishlari bo‘yicha qo‘mitadan olingan ekspertlik xulosasiga binoan, Sirdaryo viloyati IIB Tergov bo‘limi tomonidan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “a, g” bandlari bilan jinoyat ishi qo‘zg‘atilgan.

Avvalroq Surxondaryoda Suriyadagi jangarilar lageriga qo‘shilishni rejalashtirgan 21 yoshli yigit ushlangani, Suriyadagi jangarilar safiga qo‘shilmoqchi bo‘lgan o‘zbekistonlik erkak Rossiyada qo‘lga olingani, DXX xalqaro terroristik tashkiloti tarafdorini O‘zbekistonga olib kelgani to‘g‘risida xabar berilgandi.