Sirdaryo viloyati Guliston shahri va Surxondaryo viloyati Termiz shahrida kredit mablag‘laridan maqsadsiz foydalanish holatlari aniqlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Guliston shahar bo‘limi tomonidan bank muassasasining murojaatiga asosan tergovga qadar tekshiruv o‘tkazilgan. Unda “M.K.” MChJ rahbari T.H. va boshqalar oldindan til biriktirib, tadbirkorlik subyekti mablag‘larini o‘zlashtirgani aniqlangan. Ular tibbiy xizmat ko‘rsatish sohasini rivojlantirish maqsadida ajratilgan 7 milliard so‘m kredit mablag‘ining 3,5 milliard so‘mini maqsadsiz sarflab, talon-toroj qilgan.
Shuningdek, Termiz shahar bo‘limi tomonidan bank muassasasining murojaatiga asosan tergovga qadar tekshiruv o‘tkazilgan. Unda U.S. ismli fuqaro “T.Q.” MChJga norasmiy rahbarlik qilib, korxonaga tegishli kredit mablag‘larini o‘zlashtirgani aniqlangan. U non mahsulotlarini ishlab chiqarish uchun asosiy vositalar sotib olish maqsadida ajratilgan 500 million so‘m kredit mablag‘ini maqsadsiz sarflab, talon-toroj qilgan. Bundan tashqari, kredit ta’minoti sifatida garovga qo‘yilgan binoni qonunga xilof ravishda tasarruf etgan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 233-moddasi (band solingan mulkni qonunga xilof ravishda tasarruf etish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Buxoroda garovdagi qariyb 800 mln so‘mlik mulklarni sotib yuborgan korxona rahbari va sobiq bank xodimi ushlandi
- Toshkent viloyatida akasining nomiga korxona ochib, 754 mln so‘m kredit mablag‘ini o‘zlashtirgan bank bosh hisobchisi ushlandi
- Qashqadaryoda 1,1 mlrd so‘m kredit mablag‘ini o‘zlashtirgan shaxslar aniqlandi
Izoh (0)