Farg‘onada er shar’iy nikohida bo‘lgan ayolidan qutulish maqsadida u homiladorligini bila turib, Katta Farg‘ona kanaliga itarib yubordi. Bu haqda “Sevimli” kanalining “Zamon” informatsion dasturida ma’lum qilindi.
Qayd etilishicha, kelishmovchilik sabab ayol janjallashib, onasining uyiga ketgan. Ayolining ortidan borgan erkak ijara uyiga olib ketishini aytib, uni kanal bo‘yiga boshlab borgan. Kutilmaganda xotinini suvga itarib yuborib, ko‘zdan g‘oyib bo‘lgan. Cho‘kayotgan ayolni ko‘rib qolgan kimsa uni qutqarib qolgan.
Tezkor qidiruv ishlaridan so‘ng rejasi amalga oshmagan er — N.J.ning sud ishi Jinoyat ishlari bo‘yicha Qo‘qon shahar sudida ko‘rib chiqilgan. U Jinoyat kodeksining 97-moddasi 2-qismi (homiladorligi aybdorga ayon bo‘lgan ayolni qasddan o‘ldirish) bilan aybli deb topilib, 9 yil ozodlikdan mahrum qilish jazosi tayinlangan. Jazoni umumiy tartibli koloniyada o‘tashi belgilangan.
Bundan avval Farg‘onada ayol ikki nafar qizi bilan Katta Farg‘ona kanaliga cho‘kib ketgani haqida xabar berilgan edi. Qizlardan birining jasadi topilgan, ona va uning ikkinchi qizini qidirish ishlari davom etmoqda.
Izoh (0)