“Daryo”ga Samarqand viloyatining Payariq tumanidagi Chelak qishlog‘ida yashovchi fuqarolar murojaat qilib, 5-mart kuni soat, taxminan, 21:00 da elektr energiyadagi avariya sabab qishloq aholisi elektrsiz qolganini ma’lum qildi.
“Daryo” muxbiri Farhod Norbo‘tayev mazkur voqea tafsilotlarini o‘rgandi.
Ma’lum bo‘lishicha, ikki-uch kundan buyon Payariq tumanida shamol va kuchli yomg‘ir kuzatilgani bois bir nechta mahallada elektr ta’minotida uzilishlar bo‘lgan. Shuningdek, shamol ayrim uylarning tom qismiga ham zarar yetkazgan.
“Daryo” muxbiri bilan suhbatlashgan “Fitrat” MFY fuqarolarining ma’lumot berishicha, 5-mart kuni elektr energiyasida uzilish bo‘lganida hech qanday tabiiy ofat bo‘lmagan.
“Bu tabiiy ofat emas, shamol uch kun oldin bo‘lgan edi. Simlar va simyog‘ochlar eskirgan. Avariya natijasida odamlarning televizori, muzlatkichi va boshqa elektr buyumlari kuyib ketdi. Oddiy xalqqa bitta televizor olish qancha qiyinligini o‘zingiz bilasiz”, — deydi “Fitrat” MFY fuqarolaridan biri.
Ayni paytda “Fitrat” MFY raisi ishdan bo‘shagan. Shu sababli mazkur mahallada faoliyat yurituvchi hokim yordamchisi Zuhriddin Abduvosiyevning bu haqdagi fikri bilan qiziqdik.
“Tabiiy ofat-da. Yog‘ingarchiliklar bo‘lyapti. Bu holat faqat bizning qishlog‘imizda emas, ko‘p joylarda — besh nafar hokim yordamchisi hududi bo‘lgan 20 ta qishloqda kuzatildi. Bu faqatgina bizning qishlog‘imizda bo‘lganida, vaziyatni tushuntirib berardim. Hozir elektr korxonasi xodimlari tarmoqlarni ulayapti”, — deydi Zuhriddin Abduvosiyev.
Payariq tuman elektr tarmoqlari korxonasi rahbari Baxtiyor Usmonovning ta’kidlashicha, haqiqatan ham 5-mart kuni, taxminan, soat 20:30 da tabiiy ofat va yog‘ingarchilik sababli qisqa tutashuv bo‘lgan. 200 metr elektr simi uzilgan. Natijada tumandagi “Fitrat” MFY da 445 ta, “Uymovut” MFYda 531 ta, “Sarbozor” MFYda 463 ta xonadon elektr energiyasidan uzilib qolgan.
“15 ta raqamli transformatorda elektr energiyasi uzilgani sababli Chelakka elektr toki yetkazib beruvchi podstansiyada yuqori kuchlanishli avariya bo‘lgan. Mazkur holat bo‘yicha Payariq tuman elektr tarmoqlari korxonasi tezkor ta’mirlash guruhi tomonidan ta’mirlash ishlari olib borilmoqda. Yuzaga kelgan noqulay holat sababli tuman elektr tarmoqlari korxonasi fuqarolardan uzr so‘raydi”, — deydi Baxtiyor Usmonov.
Izoh (0)