Namanganda millatlararo totuvlik va diniy bag‘rikenglikni targ‘ib etishga qaratilgan “O‘zbekiston — umumiy uyimiz” shiori ostidagi festival o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Festival oldidan tashkil etilgan ko‘rgazmada viloyatda istiqomat qilayotgan turli millat vakillarining urf-odatlari, milliy taomlari, qadriyatlari va hunarmandlik ishlari namoyish etildi.
Tadbirda ishtirok etgan viloyat hokimi Shavkat Abdurazzoqovning qayd etishicha, Namanganda bugungi kunda 45 ta millat vakillari istiqomat qilmoqda. Viloyatdagi to‘rtta milliy madaniy markaz barcha sharoitlarga ega “Do‘stlik uyi”da faoliyat olib bormoqda.
Tadbir davomida rus, koreys, qirg‘iz va tojik milliy madaniy markazlari rahbarlarining har biriga 50 million so‘mdan jami 200 million so‘mlik sertifikatlar topshirildi.
Festivalda turli millat vakillarining chiqishlari tinglandi, kuy-qo‘shiq va raqslar ijro etildi.
Tadbir yakunlanganidan so‘ng mutasaddilar turli millatga mansub ehtiyojmand va bemor fuqarolarning xonadonlariga borib, ularni yo‘qladi.
Izoh (0)