Shavkat Mirziyoyev “Oqila ayollar” harakatini tashkil qilishni taklif etdi

Prezident Shavkat Mirziyoyev obro‘-e’tiborli, katta hayotiy tajribaga ega “Oqila ayollar” harakatini tashkil qilishni taklif etdi. Davlat rahbari bu haqda 1-mart kuni o‘tkazilgan videoselektor yig‘ilishida aytib o‘tgan.

“Bu harakat tom ma’noda mahallaning vijdoniga aylanishi kerak. Chunki ma’rifatli jamiyatni ma’rifatli onalarsiz qurib bo‘lmaydi. Biz Uchinchi Renessans poydevorini qurish, jamiyatda yangi ma’naviy makon yaratish haqida gapirar ekanmiz, bu ishlarni oila, onalar ma’naviyati bilan uzviy amalga oshirishimiz zarur.

Hech bir ona farzandining kelgusida baxtsiz bo‘lishini istamaydi. Shu ma’noda, men muhtarama onalarimizga murojaat qilmoqchiman. Bugun biz vatanning shon-shuhratini yuksaltiradigan tarixiy davrga qadam qo‘ydik. Shuning uchun, sizlar farzandingizning qalbiga ulug‘ maqsadlarni, ezgu g‘oyalarni singdiring, buyuk orzularni joylashga intiling.

Onalarimiz yuksak fazilatli, mard, jasur farzandlarni tarbiyalab bersa, biz ularni zamonaviy maktab va oliygohlarda kamolga yetkazamiz. Maqsadimiz — har bir oila, xonadon va mahalla mana shu ulug‘ harakatning markaziga aylansin”, — degan prezident.

Davlat rahbari, shuningdek, ikki hafta muddatda davlat boshqaruvida ayollar faolligini oshirish dasturini ishlab chiqish vazifasini qo‘ygan.

“Ayollar ishlagan va rahbarlik qilgan joylarda tartib, adolat, halollik, madaniyat yuqori bo‘lishi hech kimga sir emas. Shu bois har bir vazirlik, davlat kompaniyasi, bank va boshqa idoralar bir-ikki yil ichida o‘z tizimidagi ayollarni rahbarlikka o‘qitib, kamida 1 nafar o‘rinbosarini ham ayollardan qo‘yadi”, — degan Shavkat Mirziyoyev.

Bundan tashqari, oliygohlar, tibbiyot markazlarida ham xuddi shunday yondashuv bo‘ladi. Soliq, moliya, bank, sug‘urta, iqtisodiyot idoralarida ayollar ulushini kamida 30 foizga yetkazish lozim. Davlat boshqaruvi akademiyasida rahbar ayollarni tayyorlash bo‘yicha alohida dastur amalga oshiriladi va har yili kamida 100 nafar ayollar o‘qitiladi.