«Дарё»га Самарқанд вилоятининг Пайариқ туманидаги Челак қишлоғида яшовчи фуқаролар мурожаат қилиб, 5 март куни соат, тахминан, 21:00 да электр энергиядаги авария сабаб қишлоқ аҳолиси электрсиз қолганини маълум қилди.
«Дарё» мухбири Фарҳод Норбўтаев мазкур воқеа тафсилотларини ўрганди.
Маълум бўлишича, икки-уч кундан буён Пайариқ туманида шамол ва кучли ёмғир кузатилгани боис бир нечта маҳаллада электр таъминотида узилишлар бўлган. Шунингдек, шамол айрим уйларнинг том қисмига ҳам зарар етказган.
«Дарё» мухбири билан суҳбатлашган «Фитрат» МФЙ фуқароларининг маълумот беришича, 5 март куни электр энергиясида узилиш бўлганида ҳеч қандай табиий офат бўлмаган.
«Бу табиий офат эмас, шамол уч кун олдин бўлган эди. Симлар ва симёғочлар эскирган. Авария натижасида одамларнинг телевизори, музлаткичи ва бошқа электр буюмлари куйиб кетди. Оддий халққа битта телевизор олиш қанча қийинлигини ўзингиз биласиз», — дейди «Фитрат» МФЙ фуқароларидан бири.
Айни пайтда «Фитрат» МФЙ раиси ишдан бўшаган. Шу сабабли мазкур маҳаллада фаолият юритувчи ҳоким ёрдамчиси Зуҳриддин Абдувосиевнинг бу ҳақдаги фикри билан қизиқдик.
«Табиий офат-да. Ёғингарчиликлар бўляпти. Бу ҳолат фақат бизнинг қишлоғимизда эмас, кўп жойларда — беш нафар ҳоким ёрдамчиси ҳудуди бўлган 20 та қишлоқда кузатилди. Бу фақатгина бизнинг қишлоғимизда бўлганида, вазиятни тушунтириб берардим. Ҳозир электр корхонаси ходимлари тармоқларни улаяпти», — дейди Зуҳриддин Абдувосиев.
Пайариқ туман электр тармоқлари корхонаси раҳбари Бахтиёр Усмоновнинг таъкидлашича, ҳақиқатан ҳам 5 март куни, тахминан, соат 20:30 да табиий офат ва ёғингарчилик сабабли қисқа туташув бўлган. 200 метр электр сими узилган. Натижада тумандаги «Фитрат» МФЙ да 445 та, «Уймовут» МФЙда 531 та, «Сарбозор» МФЙда 463 та хонадон электр энергиясидан узилиб қолган.
«15 та рақамли трансформаторда электр энергияси узилгани сабабли Челакка электр токи етказиб берувчи подстанцияда юқори кучланишли авария бўлган. Мазкур ҳолат бўйича Пайариқ туман электр тармоқлари корхонаси тезкор таъмирлаш гуруҳи томонидан таъмирлаш ишлари олиб борилмоқда. Юзага келган ноқулай ҳолат сабабли туман электр тармоқлари корхонаси фуқаролардан узр сўрайди», — дейди Бахтиёр Усмонов.
Изоҳ (0)