Фарғонада эр шаръий никоҳида бўлган аёлидан қутулиш мақсадида у ҳомиладорлигини била туриб, Катта Фарғона каналига итариб юборди. Бу ҳақда «Севимли» каналининг «Замон» информацион дастурида маълум қилинди.
Қайд этилишича, келишмовчилик сабаб аёл жанжаллашиб, онасининг уйига кетган. Аёлининг ортидан борган эркак ижара уйига олиб кетишини айтиб, уни канал бўйига бошлаб борган. Кутилмаганда хотинини сувга итариб юбориб, кўздан ғойиб бўлган. Чўкаётган аёлни кўриб қолган кимса уни қутқариб қолган.
Тезкор қидирув ишларидан сўнг режаси амалга ошмаган эр — Н.Ж.нинг суд иши Жиноят ишлари бўйича Қўқон шаҳар судида кўриб чиқилган. У Жиноят кодексининг 97-моддаси 2-қисми (ҳомиладорлиги айбдорга аён бўлган аёлни қасддан ўлдириш) билан айбли деб топилиб, 9 йил озодликдан маҳрум қилиш жазоси тайинланган. Жазони умумий тартибли колонияда ўташи белгиланган.
Бундан аввал Фарғонада аёл икки нафар қизи билан Катта Фарғона каналига чўкиб кетгани ҳақида хабар берилган эди. Қизлардан бирининг жасади топилган, она ва унинг иккинчи қизини қидириш ишлари давом этмоқда.
Изоҳ (0)