Respublika shoshilinch tibbiy yordam ilmiy markazida murakkab jarrohlik amaliyoti muvaffaqiyatli o‘tkazilib, 5-qavatdan tushib ketgan yigitning hayoti saqlab qolindi, deb xabar beradi SSV matbuot xizmati.
Ma’lum qilinishicha, 23-fevral kuni bemor A. (2004-yilda tug‘ilgan) og‘ir holatda tez tibbiy yordam mashinasida RShTYIM qabulxonasiga olib kelingan.
Bemor qurilish obyektining 5-qavatidan yiqilib tushgani sababli jarohat olgani aniqlangan. U zudlik bilan shok zaliga yotqizilib, markaz mutaxassislari tomonidan bosh miya, bo‘yin, ko‘krak va bel umurtqa pog‘onasi, ko‘krak qafasi, qorin bo‘shlig‘i a’zolarida MSKT tekshiruvi hamda qorin bo‘shlig‘i, ko‘krak qafasida ultratovush tekshiruvlari o‘tkazilib, bemorga tashxis qo‘yilgan.
“Tegishli mutaxassislar tekshiruvidan so‘ng qo‘yilgan tashxis asosida bemorda zudlik bilan bir necha jarrohlik amaliyotlari o‘tkazildi. Dekompressiv lyaminektomiya, ayrim umurtqalarni reklinatsiya va stabilizatsiya qilish orqali umurtqa pog‘onasiga transpedikulyar sistema o‘rnatish kabi operatsiyalar shular jumlasidan. Yuqori saviyada o‘tgan amaliyotlar natijasida bemorning hayoti saqlab qolindi”, — deydi markaz direktori Doniyor Alimov.
Operatsiyadan keyin ko‘krak va bel sohasi MSKT qilinganda, hech qanday xavf aniqlanmagan. O‘tkazilgan jarrohlik amalyotlari va davo choralari natijasida o‘smir yigitning umumiy ahvoli yaxshilangan. Hozirda uning gemodinamik ko‘rsatkichlari barqarorlashib, kundan kunga ijobiy o‘zgarishlar qayd etilmoqda.
Avvalroq Toshkentda tanasini armatura teshib o‘tgan 17 yoshli yigitning hayoti saqlab qolingani to‘g‘risida xabar berilgandi. 24-fevral kuni bemorning ahvoli yaxshiligi hisobga olinib, uyiga ketishga ruxsat berilgan.
Izoh (0)