Polsha chegarasida uch nafar O‘zbekiston fuqarosi avtohalokatga uchradi. Bu haqda O‘zbekistonning Ukrianadagi elchisi Alisher Kurmanov o‘zining Facebook’dagi sahifasi orqali ma’lum qildi.
O‘zbekistonning Ukrainadagi elchisining yozishicha, O‘zbekistonning uch fuqarosi: Hakimov Otabek Ravshanbek o‘g‘li (2001-yilda tug‘ilgan), Xusainov Behzod Jamoliddin o‘g‘li (2001-yilda tug‘ilgan) va Solohiddinov Sherzod Shavkat o‘g‘li (2001-yilda tug‘ilgan), Polsha chegarasiga kiraverishda avtohalokatga uchragan.
Dahshatli fojia natijasida Otabek Hakimov voqea joyida vafot etgan. Qolgan ikki nafar O‘zbekiston fuqarosi Lvovdagi shahar kasalxonasida.
Ushbu voqealarni inobatga olib, O‘zbekistonning Kiyevdagi elchixonasi zudlik bilan elchixona ko‘ngillilari guruhi vakili, malakali shifokor Temurbek Yusupovni Lvovga jo‘natgan. Uning Lvovga kelishi bugun, 5-mart kuni kutilmoqda.
“Hakimov Otabekning yaqinlariga hamdardlik bildirgan holda, jabrlangan vatandoshlarning barcha qarindoshlari va yaqinlarini ishontirib aytamizki, elchixona ularning hayotini saqlab qolish, jumladan, dori-darmonlar bilan ta’minlash va Ukrainaning yetakchi shifokorlari bilan maslahatlashish uchun barcha sa’y-harakatlarini amalga oshiradi”, — deyiladi xabarda.
Shuningdek, elchixona Otabek Hakimovning jasadini o‘zbek an’analariga muvofiq mumkin bo‘lgan eng tez vaqtda o‘z vataniga jo‘natish bo‘yicha sa’y-harakatlarni amalga oshiradi.
“Shu bilan birga, biz bu masalani hal qilish mamlakatda olib borilayotgan harbiy harakatlar va ommaviy evakuatsiya tufayli murakkablashayotganini tushunishingizni so‘raymiz”, — deya ta’kidlanadi xabarda.
Elchining ushbu xabaridan so‘ng, Komil Allamjonov o‘z sahifasida Alisher Kurmanov, elchixona va boshqa mutasaddilarga tashakkur aytib post qo‘ldirdi.
“Men Alisher Kurmanov boshchiligidagi O‘zbekistonning Ukrainadagi elchixonasi diplomatlariga fuqarolarimiz evakuatsiyasida faol xizmat ko‘rsatayotganliklari uchun katta rahmat aytmoqchiman. Siz xizmat qilayotgan sharoitni tinch yurtda o‘tirib tasavvur qilish qiyin. Shu bilan birga Transport vazirligi, umuman, barcha mas’ullarga ming rahmat.
Barchangiz prezident qo‘ygan vazifa va siyosatining fidoiy ijrochisisiz!”, – deb yozadi Komil Allamjonov.
Ma’lumot uchun, O‘zbekiston Ukrainadagi o‘z fuqarolarini Polsha orqali evakuatsiya qilmoqda. 28-fevral kuni 5-martga qadar 14 ta aviareys bilan 3 245 nafar fuqaro vataniga qaytarildi.
Avvalroq TIV Polsha aeroportida O‘zbekiston fuqarolari orasida janjal va mojaro bo‘lgani haqidagi xabarlar yuzasidan izoh bergandi.
Izoh (0)