Qashqadaryo viloyatining Kasbi tumanida o‘quvchi qiz to‘rt nafar fuqaro tomonidan zo‘rlangani aytilmoqda. Mazkur xabarga munosabat bildirgan Kasbi tumani hokimligi axborot xizmati holat yuzasidan jinoyat ishi qo‘zg‘atilganini ma’lum qildi.
O‘quvchi qizning zo‘rlangani haqida xabar berilgan videodan anglashilishicha, voqea 2021-yilning iyun oyida sodir bo‘lgan.
“Dalada mol boqib yurgandim. Yonimga ikki nafar bola — Abbos va Baxtiyor kelib, ‘sen Behruz degan bola bilan yurar ekansan’, deya menga tashlanib ketdi. Ularning biri qo‘limdan ushlab, ikkinchisi zo‘rladi. Baqirsam, yana biri mening og‘zimni qo‘li bilan yopib, ikkinchisi ham zo‘rladi. Qochmoqchi bo‘ldim, ammo kuchim yetmadi”, — deydi bu haqda gapirib bergan o‘quvchi qiz.
Jabrlanuvchining aytishicha, oradan bir—ikki kun o‘tgach, Abbos va Baxtiyor yana ikki sherigi — Doston hamda Payro‘z bilan kelgan. Birinchi safar zo‘rlagan yigitlar qizni ushlab turishgan, Doston va Payro‘z esa galma-galdan unga tegingan.
14 yoshida zo‘rlanganini aytgan qizning bildirishicha, u bu voqea haqida o‘z vaqtida hech kimga, hatto ota-onasiga ham aytmagan.
“Kimgadir aytsang, seni o‘ldirib yuboramiz deyishdi”, — deydi o‘quvchi qiz.
O‘quvchi qizning onasi olti nafar farzandi borligini, zo‘rlangani aytilayotgan qiz uning eng kichik farzandi ekanini aytmoqda.
“Qizimning homilasi hozir sakkiz oylik. Bu haqda 2021-yilning dekabr oyida xabar topdim. Maktabdan ikki nafar o‘qituvchi va hamshira kelib, qizimni shifokorga olib borishimiz kerakligini aytdi. O‘shanda qizimning homiladorligini bildik”, — deydi qizning onasi.
Bu haqdagi xabarga munosabat bildirgan Kasbi tumani hokimligi axborot xizmati tuman IIB tergov bo‘limi tomonidan Jinoyat kodeksining 128-moddasi 2-qismi “a” bandi (shaxsning o‘n olti yoshga to‘lmaganligi aybdorga ayon bo‘lgan holda u bilan jinsiy aloqa qilish yoki jinsiy ehtiyojni g‘ayritabiiy usulda qondirish) bilan jinoyat ishi qo‘zg‘atilganini ma’lum qilgan. Ammo olib borilgan tergov harakatlari davomida qizni zo‘rlashda gumon qilingan to‘rt nafar fuqaro ayblovni inkor qilgani, tergov ishida dalillar yetarli bo‘lmagani bois tergov hujjati vaqtincha to‘xtatilganini yozgan.
“Bola tug‘ilib, DNK tekshiruvi natijasi e’lon qilinishi bilan tergov harakatlari qayta qo‘zg‘atiladi”, — deyiladi hokimlikning tuman IIBga tayanib bergan rasmiy munosabatida.
Mavzuga doir:
- “Qornimga qaychi yoki pichoq tiqib o‘zimni o‘ldirishim kerakligini aytdi” — Qashqadaryoda nomusi toptalib, 15 yoshida ona bo‘lgan o‘quvchi qiz
- Qashqadaryoda ishlash uchun Rossiyaga ketgan yolg‘iz onaning yolg‘iz qizi zo‘rlangani aytildi. IIB buni “har ikki tomonning xohishiga ko‘ra yuz bergan jinsiy yaqinlik” deb hisoblamoqda
- “Oyoq-qo‘llarimni bog‘lab qo‘yib, zo‘rlashdi”. Quvada 19 yoshli qizni uch kishi zo‘rlab nomusiga tekkani aytilmoqda
Izoh (0)