“O‘zbekiston terrorchilikka qarshi kurashda yetakchi o‘rinlardan birini egallaydi” – Aksilterror boshqarmasi rahbari Vladimir Voronkov

Toshkentda 3-mart kuni “BMT Global aksilterror strategiyasini amalga oshirish bo‘yicha Qo‘shma harakatlar rejasi doirasida Markaziy Osiyo mamlakatlarining mintaqaviy hamkorligi” mavzusida xalqaro anjuman boshlandi. Unda ishtirok etayotgan BMT bosh kotibining o‘rinbosari – Aksilterror boshqarmasi rahbari Vladimir Voronkov Prezident matbuot xizmatiga intervyu berdi.

Voronkov intervyuda terrorchilikka qarshi kurashda O‘zbekistonning o‘rni haqida gapirib o‘tdi.

“Kuni kecha prezident Shavkat Mirziyoyev bilan uchrashdim. Biz O‘zbekiston va Birlashgan Millatlar Tashkiloti o‘rtasidagi munosabatlarni rivojlantirish istiqbollari, xususan, hamkorlikni kengaytirish haqida suhbatlashdik. Terrorga qarshi kurash masalasiga kelsak, hech ikkilanmay shuni aytishim kerakki, O‘zbekiston bu borada yetakchi o‘rinlardan birini egallaydi. Bugungi kundagi konferensiyaga aynan O‘zbekiston rahbarlik qilayotgani ham shundan guvohlik beradi”, – deydi Voronkov.

Shuningdek, Voronkov O‘zbekiston hukumatining “Mehr” operatsiyasi doirasida bajarilgan ishlari hamda Afg‘oniston bilan olib borayotgan hamkorlik masalalarini yuqori baholadi.