3-mart kuni Toshkentda “BMT Global aksilterror strategiyasini amalga oshirish bo‘yicha Qo‘shma harakatlar rejasi doirasida Markaziy Osiyo malakatlarining mintaqaviy hamkorligi” mavzusida xalqaro anjuman boshlandi. Bu haqda “Daryo” muxbiri xabar bermoqda.
Mazkur anjumanda XXR, Rossiya, AQSh, Yevropa Ittifoqi davlatlari, Markaziy va Janubiy Osiyo, Yaqin Sharq hamda boshqa mintaqalar mamlakatlaridan 600 nafarga yaqin yuqori martabali shaxs, milliy va xorijiy tahliliy markazlar yetakchi ekspertlari, xalqaro va mintaqaviy tashkilotlar, fuqarolik jamiyati institutlari mutaxassislari qatnashmoqda.
Anjumanning ochilish marosimida O‘zbekiston prezidenti Shavkat Mirziyoyevning murojaatini Prezident huzuridagi Xavfsizlik kengashi kotibi Viktor Mahmudov o‘qib eshittirdi.
BMT Bosh kotibi Antoniu Guterrish xalqaro konferensiya ishtirokchilariga videomurojaat yo‘llab, anjuman ishiga muvaffaqiyat tilagan.
3–4-mart kunlari bo‘lib o‘tadigan nufuzli tadbirning yakuniy hujjati sifatida Toshkent deklaratsiyasi va qo‘shma harakatlar rejasining yangi tahriri qabul qilinishi rejalashtirilgan.
Eslatib o‘tamiz, Shavkat Mirziyoyev 2-mart kuni BMT bosh kotibining o‘rinbosari – Kontrterror boshqarmasi rahbari Vladimir Voronkovni qabul qilgandi. Uchrashuvda mamlakatning BMT institut va tuzilmalari, shu jumladan Kontrterror boshqarmasi bilan amaliy hamkorligini rivojlantirish masalalari ko‘rib chiqilgan.