Zelenskiy urushning davom etmasligiga umid qilayotgani haqida gapirdi

Ukraina prezidenti Vladimir Zelenskiy mamlakatdagi qurolli harakatlar uzoq davom etmasligiga umid qilishini bildirdi. Bu haqda Reuters xabar bergan.

“Urushning uzoq davom etmasligiga ishongim keladi”, — degan Ukraina davlat rahbari.

Zelenskiyning so‘zlariga ko‘ra, o‘t ochishni to‘xtatish haqidagi keng qamrovli muzokaralar Rossiya Ukraina shaharlariga zarba berishdan to‘xtatganidan keyin davom etadi. Shuningdek, u Kiyev hamda Moskva o‘rtasidagi muzokaralarning birinchi raundi besamar yakunlanganini qayd etgan.

“Ukraina agar NATO eshiklarini Kiyev uchun yopadigan bo‘lsa, o‘z xavfsizligining huquqiy kafolatlarini talab qiladi”, — deya ta’kidlagan Zelenskiy.

Zelenskiy alyans a’zolarini Rossiya aviatsiyasini to‘xtatish uchun Ukraina osmoni uzra parvozsiz hudud tashkil qilishga chaqirdi va bu NATOni Rossiya bilan nizoga aralashtirish emas, aksincha majburiy chora bo‘lishini aytgan.

Avvalroq internetda Xarkovdagi Ozodlik maydoniga yo‘llangan raketa hujumining videolari tarqalgan, Zelenskiy ushbu hujumni ochiqdan ochiq terror deb atagandi.

24-fevral kuni Rossiya prezidenti Vladimir Putin Donbass aholisini himoya qilish, Ukrainani “demilitarizatsiya” va “denazifikatsiya qilish” uchun “maxsus harbiy operatsiya” boshlanganini e’lon qildi. Kreml gap “harbiy salohiyatni zararsizlantirish” va “Ukrainani natsistlardan tozalash” haqida ketayotganini tushuntirdi. Putinning bayonotidan keyin Ukraina shaharlari bir necha bor o‘qqa tutildi. Rossiya Mudofaa vazirligi bunga aloqadorligini rad etmoqda.