Rossiyaga qarshi qo‘llanilgan sanksiyalar oltinning qimmatlashishiga sabab bo‘ldi

Rossiyaning Ukrainaga hujumi ortidan unga qo‘llanilgan sanksiyalar jahon iqtisodiyoti o‘sishiga ulkan zarba berib, xavf-xatarlarni kuchaytirdi. Bu oltin narxlariga ham o‘z ta’sirini ko‘rsatgan holda, uning qimmatlashishiga sabab bo‘lyapti. Bu haqda Bloomberg xabar bermoqda.

Rossiya bankining sanksiyalarni yumshatishda xorij zaxiralaridan foydalanishiga to‘sqinlik qiluvchi jazo choralari qo‘llanilganidan so‘ng, quyma oltin narxlari jami 2,2 foizga oshdi. Shuningdek, ba’zi rossiyalik kreditorlar trillion dollarlab tranzaksiyalarni amalga oshiruvchi SWIFT xalqaro moliya tizimidan chiqarib yuborildi.

Rossiya markaziy banki asosiy foiz stavkalarini deyarli yigirma yil ichida eng yuqori darajagacha ko‘targan bir paytda prezident Vladimir Putin javob choralarini ko‘rdi. Shuningdek, Rossiya bilan bog‘liq xorijdagi aksiyalar va qarz majburiyatlari narxlari tushib ketgani bois aksiya va obligatsiyalar savdosini butunlay bekor qildi. 

Moliyaviy bo‘shliq jahon iqtisodiyoti o‘sishiga zarba berishi yoki AQSh Federal zaxira tizimining dollarlarni yetkazib berishida undan ma’lum harakatlarni talab etishi mumkinligi bo‘yicha xavf-xatarlar ortib bormoqda.

Rossiya-Ukraina mojarolarining keskinlashuvi oltinga bo‘lgan yuqori talabni kuchaytirmoqda, — deydi ‘‘Commerzbank’’ tahlilchisi Deniyel Brizemann.

27-fevral kuni Rossiya markaziy banki ikki yillik tanaffusdan so‘ng ichki bozordagi oltin savdosini qayta tiklashi haqida xabar bergan edi. Markaziy bankda 2000 tonna oltin quymasi mavjud. 

Oltin bahosi avvalroq 1930,85 dollargacha ko‘tarilgandan keyin Nyu-York vaqti bilan soat 16:19 da 1,1 foizga o‘sdi va 1910,10 dollarga yetdi. Comex’da aprel oyi uchun yetkazib beriladigan oltin quymalari 0,7 foizga qimmatlashib, 1900,70 dollarga baholanmoqda. Shuningdek, platina narxlari tushib ketdi, kumush esa aksincha – oshdi. 

Palladiy Rossiya eksporti bilan bog‘liq uzilishlar xavfi tufayli avval 7,8 foizga ko‘tarilgan bo‘lsa, hozirda 5,9 foizga oshgan.