Ukraina hududida bo‘lgan 1,5 ming nafardan ziyod O‘zbekiston fuqarosi Polsha orqali evakuatsiya qilinadi. Bu haqda O‘zbekistonning Polshadagi elchisi Bahrom Boboyev “Dunyo” agentligiga bergan intervyusida ma’lum qildi.
Boboyev intervyu davomida Ukraina hududida bo‘lgan O‘zbekiston fuqarolarini Katovitse shahri orqali evakuatsiya qilish jarayoni haqida so‘zlab bergan. Uning aytishicha, 26-fevraldan hozirgi kungacha 800 dan ortiq O‘zbekiston fuqarosi Polsha hududidagi Ukraina—Polsha chegarasidagi nazorat-o‘tkazish punkti orqali o‘tgan. Yana 700-800 ga yaqin O‘zbekiston fuqarosi Ukraina—Polsha chegarasini kesib o‘tishga tayyorlanmoqda.
O‘zbekiston fuqarolari uchun oldindan dam olish, tibbiy yordam, shuningdek, issiq ovqat bilan ta’minlashga sharoitlar yaratilgan. Polshada elchixona xodimlari tomonidan O‘zbekiston fuqarolarining ro‘yxatlari shakllantirilmoqda. Hujjatlari mavjud bo‘lmagan fuqarolarga vatanga qaytish sertifikatlari berilmoqda.
Eslatib o‘tamiz, O‘zbekiston Tashqi ishlar vazirligi Ukraina hududida 4300 ga yaqin O‘zbekiston fuqarosi borligini ma’lum qilgandi.
O‘zbekistonning Ukrainadagi elchixonasi xabariga ko‘ra, 26-fevral kuni Toshkent vaqti bilan soat 20:30 da 90 dan ziyod O‘zbekiston fuqarolaridan iborat birinchi evakuatsiya guruhi Lvovdan “Krakovets” nazorat-o‘tkazish punkti yo‘nalishi bo‘ylab yo‘lga chiqqan.
Keyinroq elchixona mamlakatdagi o‘zbekistonlik fuqarolarni evakuatsiya qilish ishlari haqida qo‘shimcha ma’lumot berdi. Unda aytilishicha, chegarani kesib o‘tish uzoq vaqt oladi, birinchi guruh uchun bu jarayon 14 soat davom etgan.
Elchixona, shuningdek, mamlakatni tark etish uchun Moldovaga ketmoqchi bo‘lgan fuqarolarga murojaat bilan chiqdi. Elchixona xavfsizlik tamoyilidan kelib chiqib, fuqarolar uchun Moldovaga borish osonroq bo‘lsa, ushbu variantni ko‘rib chiqishlari lozim ekanini bildirgan. Uzbekistan Airways 28-fevral kuni O‘zbekiston fuqarolarini Ukrainadan Polsha orqali evakuatsiya qildi. Ilk reysda 251 nafar O‘zbekiston fuqarosi Polshaning Katovitse shahridan olib kelingan.
Izoh (0)