“Navoiy kon-metallurgiya kombinati” aksiyadorlik jamiyatining Janubiy kon boshqarmasi tashabbusi bilan Samarqand va Navoiy viloyatida faoliyat yurituvchi jurnalistlar uchun press-tur tashkil qilindi. “Daryo” muxbiri Farhod Norbo‘tayevning ma’lum qilishicha, press-tur ishtirokchilari “Zarmitan” konining 420 metr chuqurlikdagi ish jarayonlari bilan tanishgan.
Respublikada sanoat mahsulotlari ishlab chiqarishdagi ulushi 13 foizdan ortiqni tashkil etadigan Navoiy kon-metallurgiya kombinatining Janubiy kon boshqarmasida ayni kunda olti ming nafarga yaqin ishchi mehnat qiladi. Zarkentda boshqarmaning to‘rtinchi gidrometallurgiya zavodi, “Zarmitan” va “G‘ujumsoy” konlari mavjud. “Zarmitan” yerosti konining yillik ma’dan qazib olish quvvati 850 ming tonnani tashkil etadi. Shuningdek, “G‘ujumsoy” konidan yillik 800 ming tonna, “O‘rtalik” konida esa yiliga 500 ming tonna ma’dan qazib olinadi.
Yer ostida faoliyat yuritish, qazib olingan ma’danlarni olib chiqish uchun “Epirog”, “Sandvik”, “Paus”, “Miner” kabi xorij kompaniyalarining eng zamonaviy texnikalari — yerosti o‘ziyurar yuklash va tashish mashinalari, shaxta avtoag‘dargichlari, burg‘ilash qurilmalari va boshqa asbob-uskunalardan foydalaniladi.
2021-yilning avgustida qurilgan shaxta ko‘tarish qurilmasi binosi va stvol kopyori 930 metr chuqurlikkacha tushish va yer quyi sathlaridagi zaxiralarni yuqoriga — yer ustki qismiga olib chiqishni yanada osonlashtirgan. Shuningdek, ishchi-xodimlar, yuklarni tushirish-ko‘tarish va qazib olingan ma’danni yuqoriga tashish uchun qulayliklar yaratgan. Eski shaxta ko‘tarish qurilmasi esa yer ustki sathidan 300 metr chuqurlikkacha tushgan, xolos.
2018-yilda “G‘ujumsoy” konida chuqurligi 500 metr, aylanasi 6 metr bo‘lgan yangi shaxta ishga tushirilishi natijasida konining loyiha quvvati 750 ming tonnadan oshgan. 2021-yilda konda maydalash-saralash texnologik tizim va ko‘chma to‘ldirish qurilmasi foydalanishga topshirilgan. Kelgusida “G‘ujumsoy” konining ishlab chiqarish quvvatini yiliga 100 ming tonnaga yetkazish ko‘zda tutilgan.
2010-yil avgust oyida ishga tushirilgan to‘rtinchi gidrometallurgiya zavodi mamlakatimizda mustaqillik yillarida kombinat tomonidan barpo etilgan ikkinchi yirik sanoat majmuasi hisoblanadi. 2010—2021-yillarda zavodning tarkibida oltin bo‘lgan ma’danni qayta ishlash unumdorligi yiliga 1,8 million tonnadan 2 million tonnagacha oshirilgan. Oltinni ajratib olish ko‘rsatkichi esa 92,2 foizni tashkil etgan. O‘tgan vaqt mobaynida korxonada “Zarmitan” va “G‘ujumsoy” konlaridan qazib olingan 20 million tonnadan ortiq ma’dan qayta ishlangan.
Geologik tadqiqotlarga ko‘ra, Zarmitan oltin konlarining zaxiralari zavodning 2070-yilga qadar bir maromda ishlashiga yetadi.
Izoh (0)