Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилинади. Бу ҳақда Ўзбекистоннинг Польшадаги элчиси Баҳром Бобоев «Дунё» агентлигига берган интервьюсида маълум қилди.
Бобоев интервью давомида Украина ҳудудида бўлган Ўзбекистон фуқароларини Катовице шаҳри орқали эвакуация қилиш жараёни ҳақида сўзлаб берган. Унинг айтишича, 26 февралдан ҳозирги кунгача 800 дан ортиқ Ўзбекистон фуқароси Польша ҳудудидаги Украина—Польша чегарасидаги назорат-ўтказиш пункти орқали ўтган. Яна 700-800 га яқин Ўзбекистон фуқароси Украина—Польша чегарасини кесиб ўтишга тайёрланмоқда.
Ўзбекистон фуқаролари учун олдиндан дам олиш, тиббий ёрдам, шунингдек, иссиқ овқат билан таъминлашга шароитлар яратилган. Польшада элчихона ходимлари томонидан Ўзбекистон фуқароларининг рўйхатлари шакллантирилмоқда. Ҳужжатлари мавжуд бўлмаган фуқароларга ватанга қайтиш сертификатлари берилмоқда.
Эслатиб ўтамиз, Ўзбекистон Ташқи ишлар вазирлиги Украина ҳудудида 4300 га яқин Ўзбекистон фуқароси борлигини маълум қилганди.
Ўзбекистоннинг Украинадаги элчихонаси хабарига кўра, 26 февраль куни Тошкент вақти билан соат 20:30 да 90 дан зиёд Ўзбекистон фуқароларидан иборат биринчи эвакуация гуруҳи Львовдан «Краковец» назорат-ўтказиш пункти йўналиши бўйлаб йўлга чиққан.
Кейинроқ элчихона мамлакатдаги ўзбекистонлик фуқароларни эвакуация қилиш ишлари ҳақида қўшимча маълумот берди. Унда айтилишича, чегарани кесиб ўтиш узоқ вақт олади, биринчи гуруҳ учун бу жараён 14 соат давом этган.
Элчихона, шунингдек, мамлакатни тарк этиш учун Молдовага кетмоқчи бўлган фуқароларга мурожаат билан чиқди. Элчихона хавфсизлик тамойилидан келиб чиқиб, фуқаролар учун Молдовага бориш осонроқ бўлса, ушбу вариантни кўриб чиқишлари лозим эканини билдирган. Uzbekistan Airways 28 февраль куни Ўзбекистон фуқароларини Украинадан Польша орқали эвакуация қилди. Илк рейсда 251 нафар Ўзбекистон фуқароси Польшанинг Катовице шаҳридан олиб келинган.
Изоҳ (0)