Farg‘ona shahrida gaz ta’minoti korxonasi tadbirkorlardan biriga tabiiy gazdan noqonuniy foydalanishga sharoit yaratib bergani aniqlandi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Farg‘ona viloyati boshqarmasi tomonidan “Hududgaz Farg‘ona” viloyati filialining murojaatiga asosan tergovga qadar tekshiruv o‘tkazilgan. O‘rganish davomida “Hududgaz Farg‘ona” gaz ta’minoti filialining Farg‘ona shahar bo‘limi mas’ul shaxslari “B.T” xususiy korxonasining ohak ishlab chiqarish sexida o‘rnatilgan gaz hisoblash uskunasi ko‘rsatkichiga tashqaridan aralashib, o‘zgartirish kiritib, foydalanilishiga sharoit yaratib bergani aniqlangan.
Shu orqali ular davlat va jamiyat manfaatlariga 180 million so‘m zarar yetkazilgan hamda MChJ rahbarining kafolat xatiga asosan tarmoqqa qayta ulangani haqida soxta dalolatnoma rasmiylashtirilgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘onada gaz tarmog‘iga noqonuniy ulanib, 560 mln so‘m zarar keltirgan tadbirkor ushlangani, Jizzaxda tadbirkor tomonidan yetkazilgan qariyb 385 mln so‘m zararni kamaytirib berish uchun 3 ming dollar so‘ragan gaz ta’minoti xodimlari qo‘lga olingani to‘g‘risida xabar berilgandi.
Mavzuga doir:
- Toshkent viloyatidagi zapravka 623 mln so‘mlik gazdan noqonuniy foydalangani aniqlandi
- Energetika vazirligi qariyb 17 ming xonadonning 1 kunlik iste’moliga teng gazdan noqonuniy foydalanilganini aniqladi
- Toshkent viloyatida gaz zapravkani elektr tarmog‘iga ulash uchun 2 ming dollar so‘ragan bosh muhandis ushlandi
Izoh (0)