Namangan viloyati Chust tumanida tadbirkorning 118 million so‘m pulini qo‘lga kiritgan mahalla raisi aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Chust tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Unda tumandagi “Y” mahallasining B.S. ismli raisi “G.B” MChJ rahbari G‘.ning sog‘lomlashtirish va sport markazi qurish niyatida yurganini bilib, unga qurilish ishlari uchun 475 million so‘m subsidiya mablag‘ini olib berishini aytgani aniqlandi. U MChJni subsidiya oluvchi tadbirkorlik subyektlari ro‘yxatiga kiritilgani haqida soxta hujjatni taqdim etib, fuqaroning ishonchiga kirgan. Rais tadbirkorning 118 million so‘mini firibgarlik yo‘li bilan qo‘lga kiritgan.
Holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Buxoroda “temir daftar”ga kiritish uchun 400 ming so‘m pora olgan mahalla raisi ushlandi
- Namanganda tadbirkorga do‘kon qurishi uchun yer ajratib berish evaziga 700 dollar pora so‘ragan mahalla raisi qo‘lga olindi
- Qoraqalpog‘istonda MChJga tegishli qariyb 1 mlrd so‘mlik korxona va imoratlarni noqonuniy sotib yuborgan sobiq rahbarlar ushlandi
Izoh (0)