O‘zbekistonning davlat qarzi qanchaga yetganligi ma’lum qilindi

O‘zbekistonning davlat qarzi qoldig‘i 2021-yilda 26,3 mlrd dollarni tashkil qildi. Bu haqda Moliya vazirligining sharhidan ma’lum bo‘ldi.

Qayd etilishicha, davlat qarzining YIMga nisbatan ulushi 38 foizga yetgan. Jami qarzdan 23,6 mlrd dollar — tashqi qarz, 2,7 mlrd dollar — ichki qarz.

2020-yilda davlat qarzi 23,4 mlrd dollar bo‘lgan edi. Shu tariqa u 11 foizga oshdi va 2021-yil davomida 2,9 mlrd dollarga o‘sdi. Biroq YIM tez suratlarda, ya’ni 9,4 mlrd dollarga o‘sganligi tufayli davlat qarzining YIMga nisbatan ulushi pasaydi.

Xalqaro valyuta jamg‘armasining mamlakatlar iqtisodiyotiga bag‘ishlangan hisobotiga ko‘ra, O‘zbekiston Respublikasining davlat qarzi bugungi kunda “mo‘tadil” darajada hisoblanadi.

Ma’lumot uchun, davlat qarzi bo‘yicha statistik ma’lumotlar xalqaro moliya tashkilotlari va tijorat banklari taqdim etadigan ma’lumotlar asosida aniqlashtirib boriladi.

Avvalroq O‘zbekistonning yanvar oyidagi tashqi savdo aylanmasi hajmi ma’lum qilingan edi.