“Tolibon” Afg‘onistondan xorij qo‘shinlari olib ketilgandan keyin qo‘lga kiritgan qurollari sonini oshkor qildi

Afg‘onistonda hokimiyat tepasiga kelgan “Tolibon” harakati 2021-yilning yozida mamlakatdan xorij qo‘shinlarining olib chiqib ketilishi natijasida 300 mingdan ortiq yengil qurol-yarog‘lar, 26 ming og‘ir qurollar va 61 mingga yaqin harbiy texnikani qo‘lga kiritgan. Bu haqda toliblar Mudofaa vazirligi tarkibidagi Tozalash komissiyasi rahbari Latifulla Hakimiy ma’lum qildi, deb xabar beradi Al-Jazeera telekanali.

Uning so‘zlariga ko‘ra, ayni vaqtga qadar “Tolibon” vakillari Afg‘onistonni tark etayotgan xorijlik harbiylar tomonidan ishdan chiqarilgan 80 ta vertolyot va jangovar samolyotlarning yarmini ta’mirlashga muvaffaq bo‘lgan. Shuningdek, Hakimiyning aytishicha, toliblar 2021-yilning avgustida ag‘darilgan hokimiyatning va Afg‘onistonni tark etgan mamlakat Qurolli kuchlari harbiy xizmatchilariga amnistiya e’lon qilishga tayyorlanmoqda.

Avvalroq “Tolibon” o‘z armiyasidagi harbiylar sonini 150 ming kishiga yetkazishga qaror qilgani to‘g‘risida xabar berilgandi. Mamlakat Mudofaa vazirligi vakili bo‘lajak armiyaning texnik jihozlanishi haqida gapirar ekan, “Tolibon” “qator qo‘shni davlatlar bilan” harbiy texnika yetkazib berish bo‘yicha muzokaralar olib borayotganini ta’kidlagan edi.

Ijtimoiy tarmoqlarda tarqalgan xabarlarga ko‘ra, “Tolibon” vakillari hozirda tog‘li hududlarda Milliy qarshilik fronti bo‘linmalariga qarshi operatsiyalarda jangovar vertolyotlardan foydalanmoqda. Bundan tashqari, o‘tgan yilning noyabrida toliblar IShID terrorchilari tomonidan qo‘lga olingan Kobuldagi harbiy gospital tom qismini desantlashtirishda ham vertolyotlardan muvaffaqiyatli foydalangandi.