Афғонистонда ҳокимият тепасига келган «Толибон» ҳаракати 2021 йилнинг ёзида мамлакатдан хориж қўшинларининг олиб чиқиб кетилиши натижасида 300 мингдан ортиқ енгил қурол-яроғлар, 26 минг оғир қуроллар ва 61 мингга яқин ҳарбий техникани қўлга киритган. Бу ҳақда толиблар Мудофаа вазирлиги таркибидаги Тозалаш комиссияси раҳбари Латифулла Ҳакимий маълум қилди, деб хабар беради Al-Jazeera телеканали.
Унинг сўзларига кўра, айни вақтга қадар «Толибон» вакиллари Афғонистонни тарк этаётган хорижлик ҳарбийлар томонидан ишдан чиқарилган 80 та вертолёт ва жанговар самолётларнинг ярмини таъмирлашга муваффақ бўлган. Шунингдек, Ҳакимийнинг айтишича, толиблар 2021 йилнинг августида ағдарилган ҳокимиятнинг ва Афғонистонни тарк этган мамлакат Қуролли кучлари ҳарбий хизматчиларига амнистия эълон қилишга тайёрланмоқда.
Аввалроқ «Толибон» ўз армиясидаги ҳарбийлар сонини 150 минг кишига етказишга қарор қилгани тўғрисида хабар берилганди. Мамлакат Мудофаа вазирлиги вакили бўлажак армиянинг техник жиҳозланиши ҳақида гапирар экан, «Толибон» «қатор қўшни давлатлар билан» ҳарбий техника етказиб бериш бўйича музокаралар олиб бораётганини таъкидлаган эди.
Ижтимоий тармоқларда тарқалган хабарларга кўра, «Толибон» вакиллари ҳозирда тоғли ҳудудларда Миллий қаршилик фронти бўлинмаларига қарши операцияларда жанговар вертолётлардан фойдаланмоқда. Бундан ташқари, ўтган йилнинг ноябрида толиблар ИШИД террорчилари томонидан қўлга олинган Кобулдаги ҳарбий госпитал том қисмини десантлаштиришда ҳам вертолётлардан муваффақиятли фойдаланганди.
Изоҳ (0)