“Putin dunyoni imperiyalar davriga qaytarmoqchi”. AQSh DXR va LXRning tan olinishi sabab Rossiyaga qarshi yangi sanksiyalarni va’da qildi

Rossiya tomonidan o‘zini o‘zi mustaqil deb e’lon qilgan Donetsk va Lugansk Xalq Respublikalarining tan olinishi Ukrainaga nisbatan keyingi bosqinchilik harakatlarini amalga oshirish uchun bahona yaratishga urinishdir. Bu haqda BMT Xavfsizlik kengashining favqulodda o‘tkazilgan yig‘ilishida AQShning tashkilotdagi doimiy vakili Linda Tomas-Grinfild ma’lum qildi, deb xabar beradi CNN.

Uning so‘zlariga ko‘ra, Vladimir Putin o‘zining so‘nggi harakatlari bilan “Minsk kelishuvlarini parchalab tashlagan”. Rossiya prezidentining vatandoshlariga murojaatini izohlar ekan Linda Tomas-Grinfild Moskva Sovet Ittifoqidan 100 yildan ko‘proq vaqt oldin mavjud bo‘lgan Rossiya imperiyasining barcha hududlariga da’vo qilganini aytgan.

“Putin dunyo Birlashgan Millatlar Tashkiloti bo‘lmagan va dunyoni imperiyalar boshqargan davrga qaytarmoqchi. Ammo dunyoning qolgan qismi oldinga o‘tib ketgan. Hozir 1919-yil emas, 2022-yil”, — deydi u.

BMT Xavfsizlik kengashi yig‘ilishi yakunida AQSh vakili 22-fevral kuni Jo Bayden administratsiyasi DXR va LXRning tan olinishi sabab Moskvaga nisbatan yangi sanksiyalar joriy etilishini va’da qilgan. Shu bilan birga, u AQSh va uning ittifoqchilari Kremlni “muzokaralar stoliga qaytarishga va tinchlik o‘rnatish yo‘lida ishlashni” davom etishini ta’kidlagan. Rossiyaga qarshi yangi sanksiyalar qo‘llash niyatida haqida Buyuk Britaniya, Kanada va Yevropa Ittifoqi ham ma’lum qilgan. AQSh prezidenti Jo Bayden DXR va LXRga investitsiya kiritishni taqiqlovchi farmonni imzolagan.

Rossiyaning BMTdagi doimiy vakili Vasiliy Nebenzya esa Xavfsizlik kengashi yig‘ilishida jahon hamjamiyati Donbassda urushning oldini olish va Ukrainani Donetsk hamda Luganskga qarshi o‘q uzish va provokatsiyalarni to‘xtatishga majburlash masalalariga e’tibor qaratishi kerakligini aytgan. “Biz avvalgidek diplomatiya uchun ochiqmiz, ziddiyatni hal etuvchi diplomatik yechim uchun, ammo Donbassda yangi qonli urushga boshqa yo‘l qo‘ymoqchi emasmiz”, — deydi u.

Putin 21-fevral kuni DXR va LXR mustaqilligini tan olish to‘g‘risidagi farmonlarni imzoladi. Hujjatlarga, shuningdek, respublikalar yetakchilari Denis Pushulin va Leonid Pasechnik imzo qo‘ygan. Bundan oldin Putin murojaat bilan chiqib, Donetskdagi vaziyat keskin tus olganini ma’lum qildi. Bundan tashqari, u Ukrainani “qo‘g‘irchoq rejimga ega mustamlaka” deb atagan va rasmiylarni aholini russizlashtirish hamda fuqarolarga nisbatan repressiyalarda ayblagan.