O‘zbekistonda ayrim avtomaktablarning maqsadi sifatli ta’lim berish emas, balki mo‘may daromad topishga qaratilgan. Bu haqda ichki ishlar vaziri Po‘lat Bobojonov O‘zAga bergan intervyusida aytib o‘tdi.
Vazirning so‘zlariga ko‘ra, haydovchilarni tayyorlash, o‘qitish amaliyoti, yaratilgan sharoit, nazorat tizimi, mavjud imkoniyatlar joylarga chiqqan holda o‘rganilgan.
“Ochiq aytish kerakki, ahvol achinarli holatda. Xususan, hozirda faoliyat yuritayotgan 1 348 ta o‘quv tashkilotining 745 tasida o‘z binosi, 1 277 tasida o‘z o‘quv avtodromi yo‘q. Ularning 41 foizida o‘quv-mashq avtomobilidan ijara asosida foydalaniladi. Shuningdek, haydovchilarni o‘qitish maktablarida nosog‘lom raqobat vujudga kelgan. Gapning to‘g‘risini aytganda, ayrim avtomaktablarning maqsadi sifatli ta’lim berish emas, balki mo‘may daromad topishga qaratilgan”, — deydi Po‘lat Bobojonov.
“Avtomaktablarning o‘quv metodologiyasi, nazariy va amaliy o‘quv dasturlarini ishlab chiqish, shuningdek, o‘qituvchi va murabbiylarni qayta tayyorlash va malakasini oshirishga esa IIV akademiyasi mas’ul etib belgilanadi. Bundan buyon haydovchilar to‘g‘risidagi ma’lumotlarning elektron bazasi yuritiladi. Shuningdek, har bir haydovchi hamda avtomaktablarning reytingi yuritiladi”, — deya ta’kidlaydi u.
Avvalroq O‘zbekistonda haydovchilikka o‘qitish va guvohnoma berish bo‘yicha yangi tizim yaratilishi, O‘zbekistonda qoidabuzar haydovchilar uchun jarima ballari tizimi joriy etilishi hamda O‘zbekistonning barcha viloyatlarida zamonaviy avtomaktab va imtihon markazlari tashkil etilishi haqida xabar berilgandi.
Mavzuga doir:
- Siz “prava”ni qanday olgansiz? — “Daryo”da kichik so‘rovnoma
- “Kam pulga haydovchilarni tayyorlovchi avtomaktablar korrupsiyaga yo‘l qo‘yadi” — yo‘l harakati xavfsizligi bo‘yicha mutaxassis
- Komil Allamjonov haydovchilik guvohnomasini olish tizimi ustidan jamoatchilik nazorati nima uchun muhimligini tushuntirib berdi (video)
Izoh (0)