So‘nggi kunlarda Farg‘ona vodiysidagi metan gaz to‘ldirish shoxobchalarida davomiyligi bir necha kilometr bo‘lgan avtomobillar navbati kuzatilmoqda. Bu haqda “Daryo”ga murojaat qilgan haydovchilarning ma’lum qilishicha, gaz to‘ldirish shoxobchalaridagi navbatlarning yuzaga kelishi zapravkalar faoliyatiga kiritilgan cheklovlar bilan bog‘liq.
2021-yil kuz-qish mavsumida avtomobillarga gaz to‘ldirish shoxobchalari faoliyatiga dastlabki cheklovlar 2021-yil 17-noyabr kunidan boshlab kiritilgandi. Shu kuni Energetika vazirligi kuz-qish mavsumida aholi va ijtimoiy soha obyektlarini uzluksiz ravishda tabiiy gaz bilan ta’minlash maqsadida avtomobillarga gaz to‘ldirish shoxobchalariga har kuni soat 18:00 dan tonggi soat 06:00 gacha gaz yetkazib berish vaqtincha to‘xtatilishini ma’lum qildi.
Shundan so‘ng Farg‘ona viloyatidagi yuzdan ortiq avtomobillarga gaz to‘ldirish shoxobchalari tonggi soat 06:00 dan kech soat 18:00 gacha ishlash rejimiga o‘tkazildi.
“Hurmatli iste’molchilar, vaktinchalik cheklov choralari havo harorati biroz ko‘tarilgunga qadar davom etadi hamda AGTKSH tez orada avvalgi tartibda ishlash rejimiga o‘tishini ma’lum qilamiz”, — deyiladi Energetika vazirligining 2021-yil 17-noyabr kungi axborotida.
Biroq o‘tgan davr mobaynida havo harorati ko‘tarilgan bo‘lsa-da, metan zapravkalar avvalgi tartibda ishlash rejimiga qaytarilmagan. Aksincha, joriy yil yanvar oyidan boshlab viloyatdagi aksariyat metan zapravkalar ish vaqtini yana-da qisqartirib, soat 16:00 dan keyin faoliyatini to‘xtatgan. Fevral oyiga o‘tib esa, avtomobillarga gaz to‘ldirish shoxobchalari tonggi soat 06:00 dan 15:00 gacha ishlash rejimiga o‘tkazildi. Natijada viloyatdagi gaz zapravkalar oldida turnaqator navbatlar yuzaga kelishni boshladi.
2021-yilning 15-fevral kuni “O‘ztransgaz” AJ matbuot xizmati Farg‘ona vodiysidagi avtomobillarga gaz to‘ldirish kompressor stansiyalari 15-fevral kuni soat 13:00 dan 16-fevral kuni soat 06:00 gacha faoliyatini vaqtincha to‘xtatishi haqida xabar berdi. Tashkilot matbuot xizmatining qo‘shimcha qilishicha, 16—18-fevral kunlari ham Farg‘ona vodiysidagi avtomobillarga gaz to‘ldirish kompressor stansiyalari faoliyatiga shu kabi cheklovlar joriy qilingan.
Ushbu cheklovlar ortidan Farg‘ona viloyatidagi avtomobillarga gaz to‘ldirish shoxobchalari oldida yuzlab avtomobillar navbati yuzaga kelgan.
Haydovchilarning ma’lum qilishicha, turnaqator navbatlar tufayli avtomashinaga gaz to‘ldirish uchun ikki-uch soat, ba’zida besh-olti soat vaqt ketmoqda.
“Ikki kun oldin shu joydan mashinamga uch-to‘rt soatda gaz to‘ldirib chiqqandim. Bugun soat 09:00 da zapravkaga kelib, navbatga turdim. Mana, soat 13:00 bo‘ldi, hali navbatim kelgani yo‘q. Bir soatdan keyin zapravka yopiladi. Agar shu vaqtgacha navbatim kelib, gaz to‘ldirishga ulgurmasam, yarim kunim bekor o‘tgan bo‘ladi. Hali mendan keyin ham kamida yuzta mashina navbatda turibdi. Ularning ko‘pchiligi bugun gaz to‘ldirishga ulgurmaydi, baribir qaytib ketishga majbur bo‘ladi. Shuncha odam sarson. Yuzlab haydovchilar soatlab zapravkalarda qolib ketyapti. Boshida bu cheklovlar vaqtinchalik, havo harorati ko‘tarilishi bilan zapravkalar 24 soat ishlaydi, deyishgandi. Mana shu gaplar aytilganiga ham ikki oydan oshdi, kunlar ham isib qoldi. Lekin vaqtinchalik cheklovlar bekor qilingani yo‘q. Kundan kunga navbatlar ko‘payib ketyapti. Buning ustiga gazning bosimi ham past”, — deydi Qo‘qon shahridagi zapravkalardan birida navbatda turgan haydovchi Ikromjon Abdullayev.
Ko‘pchilik haydovchilar soatlab navbat kutib, mashinasiga gaz to‘ldira olmay, tonggacha zapravkada qolib ketishga majbur bo‘lmoqda.
“Ish yuzasidan Bag‘dod tumanidan Farg‘ona shahriga kelgandim. Soat 11:00 larda mashinamga gaz to‘ldirish uchun navbatga turdim. Navbatim kelishiga oz qolgandi, soat 14:00 ga yaqin zapravka yopildi. Endi ertaga ertalab soat 06:00 dan gaz quyishni boshlaydi. Mashinamda gaz tugagan, aksiga olib, benzin ham yo‘q, noiloj, tonggacha kutaman. Bugun shu yerda, mashina ichida qolishga majburman. Menga o‘xshagan haydovchilar ko‘p bu yerda”, — deydi Sarvar Muhiddinov.
Farg‘ona shahridagi avtomobillarga gaz to‘ldirish shoxobchalarida kech soat 19:00 da ham o‘nlab avtomashinalar navbatda turganiga guvoh bo‘ldik. Haydovchilarning aytishicha, gaz-zapravkalar tong soat 06:00 da ish boshlaydi. Shunday bo‘lsa-da, ko‘pchilik haydovchilar mashinalarini bir kun oldin navbatga qo‘yishga harakat qiladi. Maqsad — qatorning boshrog‘idan joy egallash va ertaroq gaz to‘ldirib olish.
“Damas avtomashinam bor. Yo‘lovchi tashish bilan shug‘ullanaman. Ilgari mashinamga bir kunda ikki marta gaz to‘ldirib, shunga yarasha ishlab, daromad qilardim. Gaz zapravkalar ham bemalol edi. Qish kirishi bilan muammolar boshlandi. Soat bir-ikkidan keyin birorta zapravka ishlamaydi. Hammasi yopiladi. Agar zapravkaga ertalab olti-yettilarda kelsangiz, tushlikkacha vaqtingiz navbat kutish bilan o‘tib ketadi. Shuning uchun bir kun oldin kechki payt zapravkaga kelib, navbatga turaman. Kechasi bilan shu yerda qolaman, tongda zapravka ochilishi bilan gaz to‘ldirib, tirikchilikka chiqib ketaman. Har kuni shu ahvol”, — deydi Furqatjon Sa’dullayev.
Ayrim shoxobchalarning nazoratchilari tomonidan asosiy navbat qatoridan tashqari “premium-navbat” ham tashkil etilgan. Uzoq kutishni istamagan haydovchi qo‘shimcha 5-10 ming so‘m to‘laydi va uzoq navbatlarsiz, ikki barobar tezroq vaqt ichida gaz to‘ldirib oladi.
“Nazoratchilarga besh ming so‘m berdim. Zapravkaning chiqish darvozasidan ichkariga kirib, bir soatga qolmay gaz to‘ldirib chiqdim. To‘g‘ri, bu tomonda ham navbat bor, lekin ishingiz tezroq bitadi. Uch-to‘rt soatlab navbatda turmaysiz”, — deydi ushbu “imkoniyat”dan foydalangan haydovchilardan biri.
Farg‘ona shahridagi metan zapravkalardan biri cheklovlarga qaramasdan tungi vaqtlarda ham faoliyatini davom ettirmoqda. “Daryo” muxbirining aniqlik kiritishicha, bu yerda shaxsiy avtomashinalarga emas, faqat yo‘lovchi tashuvchi avtobuslarga va “Toza hudud”ga qarashli maxsus transport vositalariga gaz to‘ldirilmoqda.
“Daryo” manbasining ta’kidlashicha, kun davomida shaharda jamoat transporti va obodonlashtirish korxonalarining barqaror ishlashini ta’minlash maqsadida shunday yo‘l tutilmoqda.
Hozirga kelib havo harorati ancha ko‘tarilgan, vodiyda bahor havosi hukmron. Lekin avtomobillarga gaz to‘ldirish shoxobchalari oldida turnaqator navbatlar yuzaga kelishi davom etmoqda. Haydovchilar va yo‘lovchilar soatlab vaqtini yo‘qotyapti, bu holat yo‘lkiralar oshishiga ham o‘z ta’sirini o‘tkazmoqda. Metan zapravkalardagi adoqsiz navbatlar kabi bu muammolarning ham oxiri ko‘rinmayapti.
Izoh (0)