Uzbekistan Airways bahorda Dog‘iston poytaxti Maxachqal’aga muntazam aviareyslarni yo‘lga qo‘yadi. Bu haqda O‘zbekistonning Rostov-Dondagi bosh konsuli Rustam Kurganbayevga tayanib, “TASS” xabar berdi.
Diplomatning ta’kidlashicha, parvozlarning tashkillashtirilishi O‘zbekistonda ziyorat turizmi sohasini rivojlantirishga yordam beradi. Bu boradagi tegishli ko‘rsatmani prezident bergan.
“O‘zbekiston bilan Rossiya o‘rtasida o‘zaro manfaat va almashinuv bo‘lishi kerak, toki o‘zbeklar sizlarnikiga, siz esa biznikiga keling. Buning uchun davlat aviakompaniyasi bahorda Maxachqal’aga reysni yo‘lga qo‘yishni rejalashtirmoqda. Biz barchani Samarqand, Buxoro, Xivani ziyorat va tomosha qilishga taklif qilamiz — bular 3 ming yillik buyuk shaharlar, haqiqiy sharqona ertak”, — deydi Kurganbayev.
Uning ta’kidlashicha, reyslarning ochilishi birinchi navbatda diniy turizmni rivojlantirish yo‘lida katta ahamiyatga ega. Spot’ning yozishicha, 2021-yilda O‘zbekiston tomoni Checheniston, Dog‘iston va Ingushetiya vakillariga ziyorat turizmi bo‘yicha rejalar taqdimotini o‘tkazgan.
Kurganbayev Checheniston Respublikasini alohida ta’kidlagan – u Grozniyda yangi aeroport qurilishi tugallangandan so‘ng, muntazam reyslarni yo‘lga qo‘yish bo‘yicha ishlar qayta tiklanishiga ishonchi komilligini bildirgan.
Avvalroq Maxachqal’adan Navoiy shahriga parvozlar yo‘lga qo‘yilishi, Toshkentdan Rossiyaning ikkita shahriga qo‘shimcha qatnovlar amalga oshirilishi, Uzbekistan Airways Moskvaga qo‘shimcha aviaqatnovlarni yo‘lga qo‘yishi to‘g‘risida xabar berilgandi.
Izoh (0)