Jizzax shahrida tadbirkorga imtiyozli kredit olib berish uchun pul talab qilgan Davlat soliq inspeksiyasi xodimi qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Jizzax viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbir davomida Jizzax shahar Davlat soliq inspeksiyasining davlat soliq katta inspektori A.X. “M.N.” MChJ rahbari M.ning ishonchiga kirib, bank muassasalarida ishlovchi tanishlari orqali 200 million so‘m imtiyozli kredit ajratilishida yordam berishni va’da qilgani aniqlangan. Inspektor buning evaziga 600 dollar va o‘zi uchun qaytarib berish sharti bilan 200 dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda ipoteka krediti ajratib berish evaziga fuqarodan 2 ming dollar talab qilgan bank bo‘limi boshlig‘i ushlangani to‘g‘risida xabar berilgandi.
Mavzuga doir:
Izoh (0)