Huquqni muhofaza qiluvchi idoralar tomonidan hamkorlikda o‘tkazilgan tezkor tadbirlar davomida Toshkent shahri va Toshkent viloyati hududida ekstremistik tashkilotlarning noqonuniy ravishda faoliyat yuritgan bir guruh a’zolari aniqlandi. Bu haqda poytaxt IIBB matbuot xizmati xabar berdi.
Tadbir davomida ushlangan shaxslarning yashash manzillarida o‘tkazilgan tergov harakatlari natijasida, ekstremistik oqim va xalqaro terrorchilik tashkiloti targ‘ibotchilarining aqidaparastlik g‘oyalari bilan yo‘g‘rilgan hamda taqiqlangan materiallari topilib, qonuniy tartibda rasmiylashtirilib olingan.
O‘tkazilgan tadbirlar natijasida ekstremistik tashkilotlarga aloqador 24 nafar shaxs ushlanib, ularga nisbatan tergov davom etmoqda.
“Fuqarolarimiz, ayniqsa yoshlarimizni ogohlantirib, bu kabi qonun buzilishlariga yo‘l qo‘ymaslik maqsadida buzg‘unchi g‘oyalar ta’siriga tushib, ijtimoiy tarmoqlarning shubhali saytlaridagi da’vatlariga aldanib qolmasliklarini, jamoat tartibiga tahdid soluvchi materiallardan foydalanmasliklarini, ularni saqlamasliklarini va tarqatmasliklarini so‘rab qolamiz”, — deyiladi xabarda.
Avvalroq Sirdaryoda Telegram orqali ekstremistik materiallarni tarqatish bilan shug‘ullangan shaxs ushlangani, Qo‘qonda “Hizb ut-Tahrir”ga a’zoligi uchun ikki marta qamalib chiqqan kishi yana shu jinoyati uchun qo‘lga tushgani, Farg‘onada “Turkiston islom harakati” terroristik tashkiloti g‘oyalarini targ‘ib qilgan erkak ushlangani to‘g‘risida xabar berilgandi.
Mavzuga doir:
Izoh (0)